「鵬單」婚P眾星真情流露

上周一（十五日）晚，陳展鵬同單文柔喺結婚註冊擺酒之後，再喺中環一間酒吧搞新婚派對。講到明招呼圈中朋友為主，大家可以輕輕鬆鬆玩番晚，唔使介意畀「人請」，鍾意幾點嚟、幾點走都OK！而嗰晚，東姑喺party真係見到唔少藝人，大家似乎都玩得好enjoy，齊齊戥「鵬單戀」修成正果而開心。不過，想見到佢哋真情流露，睇佢哋離開party時嘅樣，就最一清二楚。

好似賓客當中，譚凱琪同楊秀惠呢對孖公仔姊妹花咁，東姑眼見佢哋落到樓仲high爆街頭，就知佢哋喺party玩得真心投入，好enjoy喇！兩個人孖住落樓，走時似乎有幾分醉意，行路腳步浮浮，要互相扶持落樓梯級唔在講，大街大巷仲keep住hyper，似意猶未盡當街吹水。當傾到肉緊時又你攬我、我攬你，然後玩埋自拍先捨得走人，真係盡興喇！

至於，林韋辰舊愛、前《體育世界》李思雅就飲到「啤啤夫」，成個「醉娃」咁，行都行唔穩，唔知情嘅，仲以為佢受咩刺激借酒消愁？相對地，李施嬅一個人好清醒咁行出酒吧，轉頭去攞車，相信佢喺party滴酒不沾。而靚女真係去邊都有着數，東姑見party未完場，馮盈盈同埋劉佩玥都已經歸心似箭，仲有「護花使者」送佢哋離開，睇嚟兩女去蒲、去玩得嚟，都十分自愛兼檢點o架！

註冊擺酒兩日後，陳展鵬同單文柔再喺中環一間酒吧搞婚後派對，主力招呼圈中人。

譚凱琪同楊秀惠齊齊腳步浮浮離開，似乎有幾分醉意，仲要互相扶持行落樓梯。

派對之後，兩人似乎意猶未盡，心情好亢奮咁企街吹水；不過，佢哋睇嚟仲記得保持儀態。

林韋辰前度女友李思雅，走時醉到企唔穩，唔通見人哋結婚，觸景傷情？

劉珮玥有猛男護送離開，兩人仲握晒手咁，應該令唔少粉絲「葡萄」。而劉珮玥後面就有張彥博、鄭世豪幾個壯男跟尾，睇落似足佢啲「兵哥」咁。