為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 10 月 28 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

歡喜Captain

要萬幾人一齊「唏呀唏呀唏⋯⋯」,並非難事,只要有Captain Nancy薛家燕就OK!嚟緊十二月,家燕姐將會踏上紅館舞台,繼續發放歡樂power。

今次「Paco巨星飯堂」,我就特別邀請主角家燕姐,同埋佢嘅囡囡兼左右手珊珊(石祐珊),去到位於上環嘅「源品雞煲Premium」,品嘗有heart嘅火鍋,率先透露佢入行六十年嘅Party,將會令觀眾有幾咁歡喜!

雖然要為演唱會做準備,但家燕姐表示自己並冇特別戒口,但喺囡囡珊珊嘅「監控」下,佢已較少食辣。

 

靈機一觸

即將喺十二月於紅館舉行嘅《愛你無限60年演唱會》,係家燕姐第一次喺紅館開個唱,佢坦言壓力非常大,練舞練到腳痛,醫生希望佢好好休息,但家燕姐話:「咁多年來,我喺世界各地開咗幾百場個唱,但從來冇喺香港開過,我係香港人,當然希望能夠喺舞台上,同觀眾度過愉快嘅晚上啦!」

哈哈哈!Captain Nancy為香港人帶嚟咁多歡樂,少少傷患又點會影響到佢?「o依家我一日大約瞓三、四個鐘,其他嘢有珊珊(石祐珊)幫我吖嘛。哈哈!連Captain Nancy個雛型,佢都有份俾意見。之前我喺公司,拎咗個仔個美國隊長盾牌,影咗張相放上IG,啲網友話『復仇者聯盟』搵嗰第六粒寶石,就係我額頭粒癦,於是我哋就靈機一觸,將個look改良,就成為o依家嘅Captain Nancy嘞。」

家燕姐嘅開心形象深入民心,今次演唱會係佢入行六十年嘅紀念活動,佢自然加倍重視。「我入行六十年來,好多姿多采。雖然間中會遇到不如意事,但最重要係點樣克服同增值自己,不斷去創新,保持住觀眾對自己嘅喜愛,要觀眾睇足六十年都唔討厭係好難嘅事。o依家出街觀眾離遠見到我,就嗌家燕姐,我真係好感恩。

「觀眾知我每做一件事都全情投入,不論演戲、唱歌、登台演出,加上有少少人緣,有時做嘢,因為有好嘅人際關係,就會一呼百應,大家扶你一把嘅力量好重要。有大家嘅扶持,令我今時今日先可以企喺呢個位置。所以今次係報恩演唱會,希望做個好節目俾觀眾睇,對我嚟講好有意義」。

我同兩位嘉賓去到位於上環嘅「源品雞煲Premium」,品嘗有heart嘅火鍋。

 

形象大師陳華國出手打造嘅Captain Nancy造型,不難看出家燕姐嘅心思。

 

花雕醉雕鍋($198半隻/$388全隻),湯底為每日以多隻雞及藥材熬製嘅上湯,配上下單即斬鮮雞,令人回味。

 

雜錦刺身($398/五種)有海膽、油甘魚、吞拿魚、牡丹蝦及三文魚,滿足味蕾。

 

招牌辣雞煲($228半隻/$338全隻),以二十多種香料炒製,下單即斬即炒,保持原汁原味,有五種辣度可供選擇。

 

強勁嘉賓

距離紅館演唱會仲有個半月,家燕姐預計約有三十名嘉賓,o依家由佢率先透露特別環節,「七公主未必齊人,寶寶喺香港,怕冇時間排練,所以未應承。芳芳擔心跳舞同唱歌未必應付到,所以仲睇緊有咩可以做。有寶珠喺度,觀眾點都要睇佢嘅煞食金曲。我就會同謝天華跳舞,會俾佢抱起,所以要先減十磅,等天華抱得輕鬆啲。

「仲有一定唔少得Chilam,佢上得台就梗係有《十月初五的月光》嘅〈祝君好〉,呢首歌到o依家都咁膾炙人口,一定令人有共鳴。」

哈哈哈!呢首歌當年就係我為Chilam親自挑選,能夠製作呢首金曲,我都好開心。「真係嘅Paco?咁我都要多謝你嘞!」

家燕姐話自己喜愛顏色sharp醒嘅服裝,我覺得佢亦着出風格。

 

七公主友情多年如一日,家燕姐娶新抱時,除寶寶姐未趕及返港,眾公主都現身到賀﹙上圖﹚,到家燕姐開show,相信佢哋更能令現場粉絲情緒高漲。

 

 

 

南非鮑魚(時價),新鮮空運到港,不論配辣雞定醉雞煲,都襯出其鮮味。

 

手切本地肥牛($258半份/$398一份),極具質素。

 

Nancy威力

家燕姐能夠屹立不倒,因為保持追求變化,嘉賓以外,佢話今次演唱會並非懷舊,而佢嘅新歌〈Captain Nancy〉,由Rap、漫畫女英雄形象、低胸裝到MV內容,都令外界嘩嘩聲。「我要多謝背後一班創作人。我認為唔創新唔得,要保留一啲精髓,但又要有些新嘢。我搵咗王梓軒作曲,希望改良『十字步』,咁有排舞師Sunny Wong幫手,以手部動作配合原有嘅舞步。

「錄歌嗰日,王梓軒、作詞嘅C君、監製何秉舜都怕我唔接受,但我同佢哋講,如果我達唔到佢哋嘅要求,一定要話我知。本來歌名叫〈拾自步〉,即係拾回自己嘅態度、積極面對嘅意思,好正能量,但個俠女造型又很受歡迎,所以首歌就改咗叫〈Captain Nancy〉。我係咪真係可以『救地球』?我都會懷疑o架,不過既然有呢個期望,我都唔想令大家失望。」

講到創作人,家燕姐今次仲搵嚟主意多多嘅阿旦鄭丹瑞,擔任演唱會嘅創作總監,珊珊話:「以前媽咪嘅《家燕與小田》,旦哥同文雋哥分別以三十蚊一條橋嘅價錢,同媽咪sell橋,之前我哋開會,佢都有講番。」

集唔同世代嘅製作人於一show,我都對呢個演唱會相當期待,先祝家燕姐Good Show!

努力為媽咪策劃嘅珊珊,漸見女強人模樣。

 

網友對《Captain Nancy》MV都一面好評,足見家燕姐驚人嘅親和力。

 

手打五寶丸($138),全為餐廳自家製作,包括墨魚丸、牛丸、豬肉丸、鮮蝦丸及鯪魚丸。

 

牛白肉($168)為牛胸心肉,相當爽口。

 

西班牙頂級黑毛豬梅肉片($138半份/$198一份),入口唔肥膩。

 

源品雞煲Premium
地址:上環干諾道西70-72號金祐商業大廈地下A舖
電話:28577987