
朱太成功追討 成報老闆過億欠債
朱太嘅金利豐財務去年入稟高等法院,追討《成報》主席谷卓恒一億港元欠債同超過九百萬利息。谷以自己不懂英文同被「中介人」誤導先簽署借貸文件做抗辯理由,結果不獲聆案官接納,本星期一被判敗訴,要還錢畀金利豐財務。
朱太回覆本刊時直言︰「都唔知佢講嘅中介人係邊個,我完全冇畀過手續費任何人。之前畀過封律師信佢,因為佢抹黑咗我好多次!」
朱太又話,法官指谷卓恒係一個有經驗嘅商人,「如果唔識聽英文,可以搵翻譯或者搵律師。我真金白銀借錢畀佢,佢中間都有還過利息o架!」谷曾簽署七張期票畀金利豐財務作為還款保證,亦曾償還過一千萬元利息,所以無理由唔清楚協議嘅內容。
根據入稟狀,谷卓恒同金利豐財務去年二月四日簽訂一份借貸協議,借款一億元,但谷未能還款。金利豐本周一提出簡易判決申請,雖然谷要求提交新誓章,以及將涉案嘅第三方加入訴訟,並押後案件,但全部畀聆案官拒絕。

朱太指谷卓恒多次抹黑自己,認為他作為經驗豐富的商人,「唔識英文可以搵翻譯或者搵律師!」

成報主席谷卓恒去年向金利豐借貸一億元,惟之後未能遵守協議還款,被告上法庭追債。