為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2018 年 10 月 23 日

關慧玲

《東周刊》社長兼總編輯。

美酒佳餚有星睇

旅發局美酒佳餚搞到第十年,特別有聲有色。當中以開幕夜在品味館辦嘅米芝蓮十星晚宴最有看頭。聽行政總裁劉鎮漢話,單係名廚已經份量十足,計有法國名廚Pierre Gagnaire帶領香港文華東方酒店米芝蓮二星餐廳Pierre、日本料理鐵人陳建一兒子陳建太郎、上海一星素食餐廳大蔬無界陳加紅、台北二星餐廳請客樓林正青、文華廳黃永強(下圖左一)、仲有來自曼谷的Chef BEE。咁嘅陣容,難怪一位難求。

「十星晚宴」之外,記得留意「PERFECT 10」紀念品酒證套裝,皆因附送嘅限量版金腳版品酒杯,是特意為十周年特製。

十周年大盛事,特別加插點點星味,喺四百三十個攤位中,既有陳豪咖啡、古巨基餅店、鄭欣宜曲奇,另「環球街頭小吃」則有進駐香港大熱的台灣「玖五牛肉麵」,引入呢間麵店嘅賭王千金何超蓮也會到場,追唔追到星,睇你彩數。

美酒佳餚愈搞愈大,好似西班牙奔牛節、日本花火祭等,成為香港重點節目,吸引全球旅客。劉鎮漢話曾有其他地區想照辦煮碗,但都不成功,香港有免葡萄酒稅這天時地利,令本地成為世界紅酒中心,其他地區好難學。問佢美酒佳餚巡禮時間能否加長?四日展期酒商賺唔賺到錢?佢話旅發局延長日數問題不大,但唔少酒商屬小店式經營人手有限,不能離開本舖太久,而大部分酒商每年都番轉頭爭取攤位,賺唔到錢唔會咁搶手啩?

辦足十年有何難忘事?佢話始終都係一四年一役,當年金鐘有佔領事件,癱瘓整區,而美酒佳餚在中環的場地早已訂下,酒商攤位也全部確定;原地舉辦行不通,取消巡禮則擔心影響香港國際形象。經主席林建岳一搥定音搬去啟德,在距開幕僅剩嘅幾個星期內由頭搞過,其實該場地未搞過大型活動,好多基本設施都無。

之前林主席曾向筆者說過,他當年幫忙向法國那邊解釋改場地原因時,只哄說「啟德個場仲靚呀」,並無提及佔中事件,而法國酒商又OK喎,好彩有驚無險完成,o依家諗番都一額汗。

見證美酒佳餚由零開始,劉鎮漢話最開心是咁高人流聚集嘅節目,咁多年從未出現突發事故,印證香港人質素甚高。