為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 10 月 27 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

鞋業的造王者

認識信星鞋業集團(1170)係因為中學師弟陳浩文(Daniel)九十年代加入公司,之後我一直有留意呢個工業企業,Daniel目前係公司非執行主席。信星英文名Kingmaker,係已故創辦人陳敏雄改嘅,意思係協助客戶成為王者,好似公司喺九十年代成為當時新創立品牌Skechers嘅生產拍檔,品牌愈做愈大,信星就同品牌拍住上。

我話信星同鞋履牌子係拍檔真係無誇張,因為公司除咗幫客戶做ODM,仲會因應客戶嘅市場設立獨立生產線,甚至同客戶一齊策劃遷移生產基地以保持成本優勢,以及享受更吸引嘅稅項同關稅政策。上期我講到其利工業喺十年前擴展到越南,原來信星更早在二○○一年已經喺越南南部投產,後來更在柬埔寨設廠。之所以咁早部署分散產地,除咗要鞏固自己嘅競爭條件,仲係需求帶動,有客戶支持,故此整個遷移計劃多咗一重保障。

到今年三月底,信星一共有三十八條生產線,年產能超過一千二百萬對鞋,其中約八成九產能喺越、柬兩地,一成一留喺中國。中國廠房設喺珠海,一九八八年建立,由於已營運三十年,勞工技巧非常熟練,所以公司保留嚟做高端鞋款同埋急單。

我見到公司生產線有分小流水概念線同傳統操作線,原來係近年因應市場變化不斷改造生產系統而嚟嘅。信星主力做時尚便服鞋同潮流運動型鞋(athleisure),共佔上一財年營業額六成六。講得係潮流款,消費者當然唔想同人撞款,而且歐美鞋類消費仍然疲弱,品牌客戶有時都唔太肯定一個款賣唔賣得,所以就會小批量落單試試水溫。Daniel話齋,以前一張單成五萬到十萬對鞋嘅情況已經唔多見,所以佢哋設計咗小流水概念線,每條線工人少咗,而且能夠適應一萬至三萬對嘅小批量,以及轉款快嘅要求。

所謂轉款快,有時真係幾日轉一次,唔係咁多廠做得到。另一方面,如果一個款賣得,客戶立刻加單,信星又要趕貨,用小流水方式另一個好處係可以提高生產進度嘅透明度,有助即時轉款以應付急單。

上一財年公司營業額下跌三成六,Daniel解釋,公司以前追求量,因為有量至有規模效益,呢個係傳統工業嘅金科玉律。不過近年市場變化大,量產單唔多而且利潤低,所以公司改變策略,發掘市場上有增長潛力嘅品牌,以追求盈利,以及同客戶一齊成長。公司管理層視一個客戶為長遠合作夥伴,所以收一個新客之前要檢視品牌喺市場嘅認受度,品牌管理層嘅穩定性、公司財政實力,仲要畀到一個生產周期嘅訂單計劃,真係嚴謹過揀女婿。Daniel話公司唔係「揀客」,而係嚴選長期夥伴。當然,公司都要有返咁上下bargaining power至有選擇權啦。

信星一九九四年上市,明年就踏入上市二十五周年。我都認識好多上市公司,能夠持續年年賺錢年年派息嘅唔多,所以公司都有好多捧場客長揸佢嘅股份,包括股壇長毛David Webb。咁多年經歷咗幾個經濟循環,信星造王之餘自己都可謂長勝將軍。

相中右二為信星鞋業集團 非執行主席陳浩文、 執行董事黃禧超(右一)。