Back Up無雙
我一直支持電影製作，最近就有一部香港代表作品，喺票房上獲得超過八億嘅佳績，《無雙》除咗有雙影帝發哥同城城，又點少得一眾出色綠葉嘅精湛演出作back up？今次「Paco巨星飯堂」，我就邀請其中三位：孫佳君、張松枝同梁健平，暢談背後嘅故事。
我帶三位去到位於銅鑼灣嘅「鳥羽」，品嘗同電影一樣咁高質素嘅串燒，細說濃烈戲味中嘅人情味。
健平、佳君同松枝（左至右）都係公認嘅演技實力派，佢哋喺大熱電影《無雙》中，同發哥、城城同場鬥戲，令戲味更濃。
影帝加持
幕前有發哥、城城同一眾實力派演員，導演莊文強作為領導者，又為咗呢部戲嘅劇本，花咗十年心血，o依家票房報捷，我覺得仲未到頂，相信可以衝擊十億！三位嘉賓聽到我咁講，無不開懷大笑。
佳君、健平同松枝除咗歸功兩大影帝，都表示導演所寫嘅劇本，扣人心弦。佳君話：「我一開始睇個劇本，就完全停唔到手，因為布局太精采嘞！但係睇一次唔明，要睇兩三次先參透到入面嘅message。」
松枝話：「我就一邊睇一邊揭番去前面睇，因為部戲好多flashback，所以要不時睇番轉頭。」
健平就「投訴」：「乜你哋有完整劇本o架？我就得自己飾演警察嗰part，要睇戲先睇得到全部。」
哈哈哈！我就話好似健平咁仲好，電影集警匪、懸疑、動作於一身，劇本都懸疑啲，咪仲精采！
健平仲話：「導演喺現場指揮若定，我以為佢得呢兩瓣，點知做後期嗰陣，我去配音，佢全程跟足之餘，仲俾到一啲配音領班先俾到嘅意見我。跟住我聽講，佢係做配音出身，真係瓣瓣精。」
我帶三位嘉賓，去到位於銅鑼灣嘅「鳥羽」，品嘗同電影一樣咁高質素嘅串燒，細說濃烈戲味中嘅人情味。
電影係導演莊文強嘅十年心血，又有兩大影帝加持，令有份參演嘅佳君（右一）、松枝（最後排右）同健平，都深感榮幸。
餐廳選用名古屋雞製作串燒，同店名息息相關嘅雞翼（$45/串），自然係招牌作，燒得外脆內juicy，調味啱啱好，令人回味無窮。
羊扒（$88/件），燒得金黃但內裏仍然質感十足，極考師傅嘅掌爐工夫。
雞尾肉（$45/串），雞嘅獨有鮮味比雞翼更突出，屬必試菜式。
驚險場面
導演落足心機製作，演員梗係出盡全力，佳君話：「有場戲講我亂槍射天花嘅水晶燈，射到盞燈跌落地，嗰盞燈又大又重，導演就叫我乜都唔使理，望住盞燈係咁射就得。啲工作人員企到好遠，個個戴晒goggles，我企最近又啱啱做完白內障手術，見到佢哋全副裝備，本來唔驚都有少少怯啦！
「但係一roll機，我就唔理嘞！跟足導演指示做，因為盞燈得一盞，跌咗落嚟就冇o架嘞，我係咁射係咁射，最尾都好彩，一take過搞掂。」
松枝要應付動作場面，「最深刻係喺泰國拍嘅一場外景，我同智叔喺吉普車上同人槍戰，我要用右手夾住車身，另一隻手揸機關槍。嗰場戲都拍咗好耐，拍完我返到酒店，右臂內側全部瘀晒，不過嗰場戲有七部機同時影住我，搞到我好有superstar嘅感覺，哈哈！」
來自新加坡嘅佳君，雖然不時都有掛住家鄉美食，但佢話
鏡頭前嘅佳君（前）向住掛於天花嘅水晶燈亂槍掃射，相當狼死；佢話鏡頭後所有工作人員都全面戒備，戴晒保護眼罩。
健平今次同周家怡、城城嘅戲份最多，發哥喺上次《寒戰2》已經「交過手」，佢對兩位影帝都讚不絕口。
松枝同智叔喺泰國一場槍戰重頭戲，雖然銀幕上短短一分鐘，但係拍足幾日，真係一絲不苟。
雞頸（$42/串），既鮮嫩又爽口嘅部位，經鹽燒後更有性格。
牛脷（$65/串），厚切後再燒，更見鬆軟。
發哥魅力
三位嘅話題，又點少得發哥？松枝話：「唔止發哥，連發嫂都好照顧我哋，佢成日check住『發記士多』嘅存貨，淨係午餐肉、即食麵都有唔同款式。我哋就好似一家人咁，有一次發哥見我病咗，隔兩日佢仲記得，會問我好啲未，又會叫我記住戒口，好似爸爸咁o架。」
佳君就表示：「我記得我哋去加拿大拍外景嘅時候，發哥日日keep住跑兩次步，朝早一次收工後一次，後來仲話想搬埋個Stanley Park返香港。」
繼《寒戰2》再同發哥嘅健平話：「發哥演戲同做人一樣咁relax，而且佢嘅親和力係冇得輸嘅，我哋去泰國拍外景，上緊機就已經有空姐集佢郵，到上咗機，同機嘅乘客又想搵佢合照，佢好從容咁話：『唔好心急，等架機飛定咗，我慢慢同你哋影。』之後成架飛機嘅乘客都排隊，就係為咗同發哥影相，連外國人都排，我真係第一次見咁嘅場面。」
演技需要經過歲月浸淫，松枝同健平都係代表人物，兩位分別投入新戲同舞台劇嘅演出，喺不同嘅平台飈戲。
發哥selfie技術了得，呢張《無雙》團體照，一樣咁出色。
廣島蠔（$48/串），集鮮、香於一身。
芝士雞肉丸（$58/串），雞肉丸混入少許雞軟骨，更有嚼勁，中間嘅流心芝士，提升層次感。
雞皮（$38/串），燒得香脆，最啱佐酒。
鳥羽
地址：銅鑼灣耀華街16號地下
電話：28901612
