資源再分配都要諗計

香港社會表面富裕，其實七百多萬人中，貧窮人口都佔近百萬人，唔少家庭無能力買電腦畀小朋友，在科技發達的今日，無法上網學習肯定是輸在起跑線。

同新家園協會總幹事黃頌傾起，佢哋剛和中銀合作開展第二年的電腦捐贈計劃；中銀把公司換出來的幾百部電腦捐出，經新家園翻新後再分配給弱勢社群，當日新家園協會董事會副主席黃煥明仲出席咗典禮。

企業多數會定時更換電腦，部分換出來的仍然可用，但又不知如何處理，最終去咗堆填區。經社企令社會資源再分配，既環保又可以幫到人。黃頌話唔少低收入家庭的孩子因為有電腦而喺學習上大有進步。例如有個來自基層家庭嘅中二女生，平時每次做網上功課都要去圖書館預約電腦，預約唔到就無得做，o依家唔需要再為冇位而煩惱，讀起書來方便好多。有時做專題研習，查資料亦方便得多，也可以透過部電腦用文書工具做報告。

不過科技產品不可能就咁左手交右手，所以中銀同時捐埋百多萬元協助更新電腦程式及更換鍵盤等，而他們就負責找地方儲存及運送至有需要家庭。

其實，社企一直面對資源唔夠好難做更多的問題，如果流程能優化和簡化，原則上電話、Ipad、平板電腦等應該都可以同一方法回收，而再者多些企業參加，受惠人數會更多。
其中一個優化方法，係提供電子平台。例如佢哋之前推出「關愛家園咭」，提供各類衣食住行優惠畀長者、低收入家庭、殘疾人士、新來港及少數族裔人士，以及其他弱勢社群，經常有幾蚊買包米、一蚊包通心粉等優惠。其後升級為手機App，聯結二十多間企業例如三聯書店等，將各種慈善優惠放上去，會員隨時見到。用App來做唔需要搵地方儲貨，不過當然也要有資源管理個App。所以話o依家做社企都需要費盡心思諗計，因為對善長來說，行政費愈少，能幫的人才會更多。