《延禧》兩大公公起底

大熱劇集《延禧攻略》，雖然已播出大結局，但話題依然不斷，包括飾演太監嘅「綠葉」，大家對佢哋都好關注；尤其係乾隆皇帝身邊嘅「李玉」公公，網民大讚佢肥頭耷耳好可愛，又成日做乾隆御用嘅出氣袋，帶動出唔少歡樂氣氛！東姑所知，飾演李玉嘅劉恩尚，今年三十五歲，〇五年參加湖南衛視選秀節目《閃亮新主播》晉身二十強；同年，又參加亞洲新人歌手大獎賽，贏得最佳新人獎。不過，o依家佢唔做主播又唔係歌手，而成為咗「綠葉王」，每年平均參與三套長劇。

日前，「李玉」仲喺社交網公布婚訊，上載一張男女合照，並留言話：「祝福我，我要結婚了！」即使佢未說明女友身份，但網民馬上起底，估計「新娘子」就係女演員管樂，而管樂仲係個樣子清秀嘅小美人添！不過，「李玉」好快又將貼文刪除，搞到網民一頭霧水，都唔知佢嘅結婚消息真定假。

喺《延》劇中，成日跟喺乾隆皇帝身邊嘅「李玉」公公，喜感十足，令套劇輕鬆咗唔少。

參加過主播選拔同歌唱比賽出身嘅「李玉」，現實中都好型、好yeaho架！

日前，佢喺社交網上載咗張男女遮晒樣嘅合照，之後又忽然留言：「祝福我，我要結婚了！」

另一個較搶戲嘅太監，就係令妃身邊嘅「小全子」。喺順嬪陷害令妃打入冷宮嗰幾集，佢假裝投靠大奸人袁春望，背叛主子，實情係「無間道」，最後亦成為令妃身邊最忠心嘅太監。東姑所知，飾演「小全子」嘅鄭龍，今年三十歲，係新生代嘅性格演員。雖然佢名氣唔算高，但喺《延》劇之前，就已經拍過唔少電視劇，好似《鳳囚凰》、《偏偏喜歡你》等等。喺《延》劇中，外表娘娘腔扮演太監嘅佢，現實中嘅氣質，可以講完全唔一樣，gel起個頭、着番時裝上嚟，成個man爆、有型有款嘅男model咁，原來佢嘅顏值都幾高嘅添！

太監「小全子」幫令妃做「無間道」，阻止咗大奸人袁春望嘅陰謀，最後更成係主子身邊最忠心嘅奴才。

飾演「小全子」嘅鄭龍，時裝造型man爆又有型，原來佢嘅顏值咁高。

今年三十歲嘅「小全子」，入咗行九年，已經拍過唔少劇集，係中國新生代嘅性格演員。