麥明詩潮爆「掃把腳」

讀法律出身嘅港姐麥明詩（Louisa），久唔久喺社交網度爆seed，有時評論吓社會時事，有時雞毛蒜皮嘅事都有感而發，而佢喺J2台嘅節目《#後生仔傾下偈》，有時言論仲好出位同埋大膽添！

早前，東姑就喺新蒲崗巧遇麥明詩，同埋幾個演員為無綫新劇《是咁的，法官閣下》，喺一間茶餐廳拍攝宣傳片。劇中飾演律師嘅佢，角色似係度身訂造，難怪佢着住端莊嘅套裝，睇落入型入格好專業。之但係，東姑再望真啲，佢對厚底潮鞋就完全唔襯全身嘅裝扮，有啲「觀音頭掃把腳」囉。

另外，東姑見佢開工期間，下至於對場務工作人員，上至於對同劇演員王梓軒、黎振燁都好健談，不時主動撩傾偈，大家有講有笑，睇嚟佢唔似得罪人多、稱呼人少嘅人，相信都幾易相處嘅！

讀過law嘅麥明詩，着起套裝扮演律師寧舍入型入格，只不過腳上對潮款厚底布鞋就有啲「掃把腳」。

同場嘅王梓軒、黎振燁都喺劇中扮演律師，同麥明詩一樣親切，笑晒口同東姑打招呼。

現場所見，麥明詩無論同演員對手，抑或場務、助導，都好傾得埋，大家有講有笑。