為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2018 年 10 月 09 日

關慧玲

《東周刊》社長兼總編輯。

邊個叫得郁劉德華?

劉德華因為幫團結基金一條填海造地宣傳片做旁白,而遭到網絡欺凌,幾乎是洗版式的謾罵,由「五十歲至生到個女你都唔積福?」,到「上次跌親跌你唔死呀」之類,幾難聽都有,人氣高如華仔都受此「招呼」,真係始料不及。

土地不是一種辯論嗎?有不同聲音其實很正常。藝人就不能有看法?一定就是矇查查支持?網絡毒舌倒是其次,很多輿論針對他唔知頭唔知路去做呢樣嘢,甚至話佢受壓、或因為利益而做。只不過,有熟悉華仔的人對筆者說,佢每做一件事,一定先了解清楚,而佢唔想做嘅嘢,無人會叫得郁佢。

據說團結基金搵到佢出山,全靠城中公關界大姐大拉攏,向董建華引薦。不過華仔唔係一開始就答應,而係用咗三個月同佢哋研究東大嶼填海係唔係一個好方案。消息人士甚至用上「切磋」呢個字眼,話華仔都幾仔細了解點解有咁嘅建議,為何加大做人工島。佢後來仲反建議話,只係宣傳片唔夠,不如做多一條動畫更貼地解釋,團結基金也接受,「最重要一點,佢真心認為填海可以長遠解決香港唔夠地嘅問題,如果唔係,佢唔會用個『我﹄字去做旁白,佢睇稿也認真,改動過一些字眼。」

華仔曾經講過,自己基層出身,住鑽石山木屋區,家裏很窮,沒有讀書的條件,走到今時今日成為天王巨星並不簡單。其實他成長那年代,很多土地都是靠填海得來,是常態。沒有那些移山填海,香港根本不會有今日的發展。他以過來人角度撐填海,其實並不意外。那段旁白的弦外之音,更有點對香港停滯不前的憂心。

如何搵地解決住屋,其實是好貼地好民生的議題,填海也只是一個角度;然而在泛政治化的今日,就算是人氣天王都要受罪,香港,可能真係已經變成咁。