主頁 > 專欄 > Paco巨星飯堂 > 高質煲劇 2018 年 10 月 14 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

高質煲劇

時間寶貴，所以即使係娛樂，都唔應該虧待自己，要挑選高質素嘅作品欣賞，好似正在熱播嘅劇集《蝕日風暴》，由金牌電視製作人梁家樹領軍，集Chilam、王陽明同Fiona擔綱，就啱晒劇迷慢慢煲。

劇中仲有唔少實力演員，用心演出，好似梁靖琪（Toby）、艾威、麥包同郭政鴻，今次「Paco巨星飯堂」就誠邀四位，去到位於西營盤嘅「小牡丹」，品嘗特色京川菜，暢談拍劇背後嘅故事。

麥包、鴻爺、Toby同威哥喺新劇《蝕日風暴》中，各有發揮空間，呢套耗資1.8億元製作嘅高質劇集，可以透過「黃viu煲劇網站」觀賞。

瞓身演出

講到呢套劇集，除咗斥巨資製作，仲遠赴馬來西亞、匈牙利布達佩斯等地取景。而我都有去馬來西亞探班，Toby話：「Paco嚟探班嘅時候，我就啱啱受傷，仲要唔係因為拍打戲整到，而係喺當地山區拍攝嘅時候，劇組為方便我哋，就設置咗流動洗手間，但因為周圍啲路好斜，嗰日又落雨，我就跣低咗，整到條尾龍骨。」

Toby今次同爹哋梁家樹父女檔上陣，並未因而獲厚待，反而要加倍瞓身。「我喺劇中飾演『娃娃兵』，脫離咗販毒集團，但仲要為錢賣命，所以有好多打戲，我有打開boxing所以都ok。我反而緊張自己演戲嗰方面多啲，好多時拍完一個take，我都會問吓導演，睇吓佢哋覺得我嘅演繹方式得唔得，攞多啲意見。」

同Toby有同場嘅鴻爺話：「每次同Toby合作，佢都有進步。」Toby立即表示：「呢度個個都係我嘅師兄，真係睇住我成長，我自問以前演戲都有好多不足，但係o依家我有咗唔同嘅經歷，到演戲嘅時候，就可以運用番出嚟。」

我帶四位嘉賓，去到位於西營盤嘅「小牡丹」，品嘗特色京川菜，暢談拍劇背後嘅故事。

飾演脫離毒販集團嘅「娃娃兵」，Toby嘅發揮空間甚廣，而且動作場面都要親身上陣，佢話劇集係佢入行以嚟最認真嘅演出。

夫妻肺片（$72），以牛舌同金錢肚製作，兩者口感各有特色，互相配合。

富貴蜜汁火方（$168/六件），選取金華火腿最矜貴部份，經兩日烹調製作，極考心機。

濃湯雲吞雞（$288一份、$168半份），濃湯以老雞、湯骨熬製最少五小時而成，滋味無窮。

師兄出馬

講到一眾「師兄」，鴻爺今次飾演Chilam嘅上司，係一名勇探。「我好耐之前同Chilam分別喺《射鵰英雄傳》同《水滸無間道》合作過，十幾年後再同佢演戲，我覺得佢o依家演得鬆好多，真係融入咗落去角色入面。

「今次我飾演佢嘅上司，同阿Fi都有唔少對手戲。本來我係做陳啟泰嘅國際刑警角色，但後來改咗做o依家呢個角色，都係有唔少發揮嘅。」

艾威即刻風趣咁話：「本來我就做Chilam嘅角色（哄堂大笑），但我就揀咗o依家呢個坐緊監嘅社團大佬去演⋯⋯仲要同一大班男人做戲，我喺記招先知原來個劇有咁多靚女一齊演，下次都係睇清楚劇本先接。」

同威哥一樣有監獄戲份嘅麥包，就大讚劇集製作認真。「我哋係去監獄實地拍攝，我都係第一次去監獄拍，去咗三日，真係大開眼界。我嘅角色後來係俾梁漢文殺死，今次係我同佢自一齊主持《Sunday新地帶》之後，事隔廿幾年嘅合作，仲係第一次一齊拍劇，所以好有感覺。」

Toby同鴻爺昔日時有合作，今次後者大讚前者演技更見進步，實屬好事。

動作場面對於鴻爺嚟講，絕對冇難度，不過今次佢飾演嘅角色，就只需要同歹徒追逐，或者如圖中向女主角Fiona落命令，咁自然演得舒服。

小籠包（$40/四個），全自家製，皮薄湯汁多。

生煎菜肉包（$30/三個），外微脆內juicy。

京葱三味扒鴨（$298一隻、$168半隻），鮮鴨先炸後炆，保持豐富肉汁。

至Fit教練

今次劇集喺馬來西亞取景，有份拍攝外景嘅Toby，仍然對當地嘅湯河粉念念不忘。「嗰度嘅雞湯河粉真係好好食，喺香港食唔到嗰種味道o架！」

身為健身教練嘅佢，對飲食keep fit梗係有心得。「為咗keep fit，我試過食足一年幾烚雞肉，食雞食到我爹哋叫我唔好食咁多，因為好多激素，之後我就只係食organic嘅雞肉。o依家我就冇食得咁齋，但會keep住做運動，如果好忙嘅話，一個禮拜都會做一次運動，打四十五分鐘拳，再做其他cardio或者TRX。」

要保持完美體態，Toby話持之以恆咁做運動，先係最健康同最有效嘅方法。