為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 10 月 13 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

盒裏乾坤

我近年經常到澳洲探親兼休息,好享受嗰邊嘅健康生活。太座一向好注重孫仔孫女嘅健康,所以去到澳洲一定大量入貨,我陪行途中留意到太座特別鍾意買各式各樣嘅塑膠和玻璃盒,佢話用嚟裝食物、食材、小朋友手巾等等,仲話食物盒要安全衞生、耐熱無毒,密封唔漏,而澳洲嘅產品安全要求好高,所以寧願老遠搬返香港。

我都同意,澳洲要求嚴格,好似當地嘅消費者法就規定,任何銷售嘅產品都要安全、無錯失、外型可接受,功能要符合一般預期,如果消費者認為任何一項未符理想,都可以要求退款,嚴重者有可能被永久禁售。

喺澳洲我見到好多地方都有賣一個叫「clipfresh」嘅塑膠家居用品牌子,當時仲以為係當地出品,後來認識咗新昌創展控股(1781),至知道呢個原來係名副其實嘅香港品牌。新昌創展已經有成三十年歷史,做ODM起家,係傳統工業公司,靠塑膠產品做到市場龍頭,二○一七年喺中國塑膠家居用品行業中按營業額計排行第四,以出口貨值計排行第三。

公司做ODM累積咗豐富設計同開發經驗,就喺二○一○年以自己嘅「clipfresh」品牌推出產品。膠盒有好多種,一個幾毫都有,但係公司決定以中高檔定位,所以用心研究產品功能。好似食物盒和飲具一般都有一個扣鉸位,可以「拍」實個盒,公司就獨家研發一種耐用嘅密實扣鉸位,有密封同防水特性,使食品隔絕空氣、濕氣同氣味,仲攞咗專利。為咗測試扣鉸位嘅耐用性,要試「拍」過萬次。品牌產品可以銷往澳洲、英國、美國、新西蘭及德國等要求嚴格嘅市場,不無道理。

公司目前有過千款產品,透過直銷去到知名連鎖超市、百貨商店和連鎖家居用品零售商渠道,外銷亦有經出入口商。出口去外國市場要通過食品安全、高耐熱性、熔融指數、性能同色移等檢測,其中歐洲、美國、澳洲等嘅規定都唔同,有時客戶落單前甚至要去工廠現場審核,入場門檻唔低,喺呢方面公司佔有一定優勢。

睇返二○一七年同今年上半年,五大客戶佔總收入八成一和八成五,有客戶集中嘅風險。公司解釋過去長期同主要客戶維持穩定關係,好似五大客戶之中四個客同公司已經合作超過八年。另外,「clipfresh」品牌產品銷售收入一直增長,由二○一四年近六千二百萬港元增至二○一七年近八千三百萬港元,長遠有助擴闊收入基礎。

新昌創展月初上市之後,會提升品牌認受性,以推動銷售。另一方面,公司會增強產品設計和開發能力,同埋會收購和更換生產機械設備。公司目前有二千套模具,係其中一項競爭優勢,上市後會再買或者開發模具同配件,以開發更多產品。

一個盒反映出一個香港企業嘅專注努力,亦代表一個香港品牌嘅成就。新昌創展係有品牌有原創力嘅香港工業股,市場上實在唔多。

新昌創展係有品牌有原創力嘅香港工業股之一。