吳嘉龍「大男人」對待女朋友

笑匠吳耀漢嘅兒子吳嘉龍（Carl），向來花弗，但係自從識咗馬來西亞籍華裔圈外女友之後，就定性咗好多。兩個人拍拖五年，Carl仲開聲話考慮過人生大事，有打算明年同女友拉埋天窗咁話。

早前，東姑就喺中環嘅ifc商場，巧遇佢同女友。現場見佢哋拎住兩盒打包嘅食物，似係啱啱食完午餐惜食拎走；之後，兩人行咗入商場內一間超市，喺雪櫃度選購飲品。不過，Carl全程嘅態度都好冷淡，對女友表現愛理不理；並由得女友自己搵嘢飲，佢就企喺旁邊掛住玩電話，就算出去櫃枱畀錢，都係女友負責排隊兼找數，「大男人」到當正女友係「阿四」。

唔知係咪佢哋拍拖拍得耐，感情穩定得嚟冇晒新鮮感，Carl連基本嘅風度都冇埋。後來，兩個仲一前一後、行到離行離列，搭lift上咗商場嘅天台，坐樓梯煲煙。不過，兩人坐低依然冇乜偈傾，自顧自低頭玩電話，只係偶然冷冷淡淡傾一句半句。最難得嘅係一個願打、一個又願捱；東姑所見，佢女友個樣，似乎又完全唔介意，可能已經習慣晒！

對女友相當冷淡嘅Carl，好似被迫去shopping咁款，個樣仲面燶燶。

女友拎住兩盒打包食物同飲品，手忙腳亂排隊畀錢，而阿Carl則掛住玩電話。

就算上到商場天台煲煙，都係各顧各，兩人掛住低頭玩電話，近乎零交流。

四十二歲嘅Carl一頭白頭髮，個樣睇落好老態。弊傢伙，離遠睇佢仲有啲似阿伯添！

好難得先見佢同女友交流傾偈，不過，都係一句起、兩句止。

一代笑匠吳耀漢與外籍妻子，除咗誕下兒子吳嘉龍之外，仲有三個女兒。