黃秋生舞大刀賀壽

八二年入行嘅黃秋生，飾演過唔少深入民心嘅變態佬角色；但係佢喺電影《葉問：終極一戰》中，飾演功夫了得嘅葉問，同樣令觀眾刻骨銘心；就連該片的老闆兼詠春高手冼國林師傅都大讚：「黃秋生係一個內斂嘅人，其實佢嘅武術根底非常厲害，影片中有好多精彩嘅武打場面，都係黃秋生真身實戰，從不用替身。」

而秋生亦都同東姑講過：「自己從十幾歲開始就練功夫，本身就係大聖劈掛門嘅門人，而大聖劈掛門同詠春拳有着異曲同工之處，所以拍打戲，我冇驚過。」六年前，佢仲辦過「中國傳統國技總會」，宣揚武術國粹添。

早排，東姑就去咗秋生同「中國傳統國技總會」嘅會長周強師傅嘅生日會。喺徇眾要求之下，秋生就即席攞起大關刀表演；而渾身是勁嘅佢，功架十足，型到爆燈，令到全場呼叫！

一時技癢嘅黃秋生，即席表演舞大關刀，刀風震懾全場，有姿勢兼有實際。

黃秋生一揮刀，全場即時起哄，而佢當晚都玩到似關公上身，面紅耳熱。

五十七歲嘅黃秋生，早排同「中國傳統國技總會」嘅會長周強師傅，一齊慶祝生日。