陳展鵬帶老婆見兄弟

早前，陳展鵬（煎pang）同單文柔去英國同法國影婚紗相；其實，佢哋只係用咗四日影相，但係就用咗五、六日周圍遊玩，預支蜜月。之後，兩人未夠喉，再飛去咗加拿大多倫多一轉，搵喺亞視嘅好兄弟、九九年香港男士冠軍杜挺豪，同佢分享呢個喜訊。

唔講唔知，煎pang同杜挺豪相當老友，以前成日約埋一齊去打高爾夫球、羽毛球。即使煎pang去咗無綫發展，而杜挺豪就返咗加拿大做地產同埋電台節目，兩人嘅感情依舊。因為煎pang只要唔使拍劇，就會飛去多倫多玩幾日，同好兄弟一齊打下波，飲下酒；所以杜挺豪一早就知道煎pang結婚，為咗要保密，佢都忍得好辛苦，仲同東姑講：「佢兩個真係好鬼夾同埋好鬼襯，希望佢哋快啲生番個BB畀我做契爺。」

快將結婚嘅陳展鵬同單文柔，去到邊度都放閃，以及打情罵俏，羨煞旁人。

陳展鵬同單文柔擺晒甫士，畀杜挺豪幫佢哋影相，而煎pang一見鏡頭就即刻chok爆！

呢張三人行嘅背影相，證明陳展鵬同杜挺豪兄弟情比金堅，盡在不言中。