為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 10 月 04 日

《施政報告》前瞻 唔BUY黃遠輝建議

土地供應大辯論經已完結,土地小組上周一向寫緊任內第二份《施政報告》嘅特首林鄭月娥呈交初期觀察報告,鋪陳五個較多人討論嘅覓地選項,包括發展棕地、善用新界私人農地、維港以外地方填海等,據了解政府似乎傾向採用公私營方式發展農地、棕地等私人土地,但就唔Buy小組主席黃遠輝早前倡議成立獨立機構,負責協調合作細節,避免令公眾有「官商勾結」嘅感覺。

消息人士話,目前唔少農地及棕地嘅業權都屬於發展商或鄉事派人士擁有,「呢類土地儲備數量可觀,過去一直因為有關土地被限制用途,所以遲遲未被發展,如果用公私營合作方式就能夠拆牆鬆綁,釋出大量土地。事實上,呢個方案亦得到唔少政黨支持,相信被政治化嘅機會相對較低。」

對此黃遠輝早前受訪時建議成立一個類似市建局嘅獨立機構,負責協調公私營合作嘅細節,避免令公眾有「官商勾結」嘅感覺。消息人士話,政府內部對此有保留,「大家都想加快發展閒置嘅土地,但黃主席嘅建議就同呢個原則背道而馳,架牀叠屋只會拖慢程序。」

黃遠輝(圓圖)提議建立獨立機構處理公私營發展棕地等申請,但消息指政府對此有保留。

至於點樣釋除「官商勾結」嘅疑慮,消息人士認為:「其實提升公營房屋嘅比例,唔畀私人發展商賺到盡,已經足以釋除公眾疑慮,又能夠滿足市民住屋訴求。」

除咗開發新嘅土地資源,有消息指《施政報告》亦研究點樣重建舊區,其中一個重點係重建公務員合作社樓宇。政府喺五十年代用優惠價批地畀公務員用合作社方式起樓,呢類項目全盛時期有近二百四十個,大部分樓齡達四、五十年,位處市區,但樓高僅幾層,未能有效善用市區土地資源。

房協曾推出先導計劃,將有關樓宇重建為資助房屋出售,但先要收集百分之百嘅業權同意,因為唔少業權持有人已離世或移民外國,當年嘅計劃無疾而終。政府消息人士話,今屆政府擬將呢個未完成嘅任務交畀市建局搞,希望重建成資助出售房屋或者私樓。消息人士解釋,市建局做重建較房協有彈性,「如果係為改善社區環境,市建局有權動用《收回土地條例》收回所有業權,做起事更得心應手。」

公務員樓多數位於市區,但只有幾層高未用盡市區土地資源。