為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2018 年 10 月 02 日

關慧玲

《東周刊》社長兼總編輯。

馬時亨變馬巡場

高鐵終於順利開通,港鐵各方暫緩一口氣。首次第一個內地黃金周,面對真正考試。原來主席馬時亨好緊張,開通以來日日在西九站坐陣緊觀其變。佢仲會在站內周圍巡,畀市民野生捕獲,佢又送吓高鐵紀念品。跟佢行一轉,發覺佢都幾受歡迎。

馬時亨坐陣高鐵黃金作戰室,負責策略上嘅應變,而港鐵車務營運總管李勝基(基哥),就坐陣白銀作戰室,負責實務上嘅緊急應變,例如人龍分流等。捱到雙眼紅筋爆現嘅基哥話,呢幾日無認真合上眼休息,有日仲對着馬時亨一齊做足十九個鐘。

馬時亨話,回歸後大型基建除咗新機場、就只有西部通道。西部通道唔需要處理人流,而以機場和高鐵相比,高鐵營運相對流暢。

馬時亨話,高鐵香港段首日一開幕已對開九十五班車,內地鐵總非常幫忙,運作無甩轆。其實內地車站開通一般先以約六十班車試行兼做壓力測試,係香港咁勇,而班次會視乎人流不斷調整。依家有聲音話高鐵唔夠客量係大白象,佢預言這情況幾年後應該調轉,到時肯定有批評話高鐵建造時唔夠遠見起得唔夠大,應付唔到大量人流。有人話不如將相關報道及主席呢句說話放入時間錦囊儲存西九站,將來慶祝十周年時再起出來,引證物換星移,輿論之短視。

事實上高鐵香港段連接內地路只會愈來愈方便,馬時亨話現時由香港去潮汕約兩三個鐘,鐵總計劃由深圳北鋪設車速達三百五十公里的新路線直去汕頭,將來通車後,由香港西九往潮汕只需個半鐘,真係去食餐飯再回來都不用到深夜。

行經西九站,會經過一幅由相片砌成動感號外形的壁畫(下圖),原來係馬主席嘅建議。他在杜拜全球最高建築物哈利法塔見過類似設計,由工程團隊嘅個人相片砌成畫作,馬主席略作改良,將高鐵建造過程,和涉及活動嘅照片組合起來,成為有意思的創作。經過記得去打咭。