電影人嘅責任，除咗係製作高質素作品，電影引發觀眾嘅共鳴，亦係重要一環，題材貼地固然有分加，能夠帶出背後嘅大道理，就更加考驗功力。即將上映嘅電影《非同凡響》，係一套關於「特別兒童」嘅作品，仲涉獵邊青、尖子兩個極端，係一個發生喺你我身邊嘅故事。

今次「Paco巨星飯堂」，就邀請電影導演歐文傑，率領男女主角岑珈其同余香凝（Jennifer），去到位於尖沙咀嘅「面譜京川料理」，細說呢個關於生命嘅悠揚樂章。

喺導演歐文傑（左）嘅領導下，Jennifer同珈其喺電影中各有好表現，演繹出動人樂章。

弦外之音

導演歐文傑係有heart嘅電影人，今次佢表示，想透過電影對有特殊教育需要嘅兒童，有更深入嘅了解，令更多人體會到，每個學生都有自己嘅困難及需要。

「不論來自任何階層、背景，擁有咩天賦、才華同成就，每個生命都係非同凡響嘅。電影《非同凡響》，顧名思義就係優秀，故事中嘅角色都係平凡人，佢哋未必有驚天動地、悲天憫人嘅經歷，佢哋演出咗一個不被主流社會重視嘅音樂劇，做好本份緊守崗位，平凡中見不平凡，或者就係現今社會所忽略嘅嘢。

「一個人係完成唔到一個音樂劇，真正嘅『非同凡響』，係全賴所有人齊心，牽手踏上舞台，先可以發出震撼響亮嘅歌聲。部戲嘅英文片名係『Distinction』，可以解作優秀、非凡，但同時都代表咗區別嘅意思。因為有比較，所以有優秀；亦因為有比較，所以就將人區分咗。一個小朋友嘅成長，需要合適嘅土壤氣候，同適量嘅施肥灌溉。每個小朋友所要嘅嘢都唔同，成長速度亦唔一樣。呢套係關於『特殊小孩』嘅電影，因為每個小朋友都有佢哋嘅『特殊需要』。」

我帶三位嘉賓，去到位於尖沙咀嘅「面譜京川料理」，細說呢個關於生命嘅悠揚樂章。

連電影海報都甚具心思，不難令人感覺到導演嘅誠意。

導演用心製作電影，帶出嘅訊息更加令人深思。

蒜泥雲片白肉卷（$98），豬肉捲上青瓜，淋上特製醬汁，值得加分。

彩虹（$148），帶辣嘅素菜配上香脆夾餅，入口層次感豐富。

蒜香花生苗炒三絲（$128），色彩斑斕，誘發食慾。

素顏上陣

雖然電影未正式上映，但主題曲〈陽光普照〉已經有得聽，仲係Jennifer去年進軍樂壇後，第四首個人作品。「今次係我第一次唱電影主題曲，導演搵我唱嗰時，我覺得好意外o架，因為自己上年仲係樂壇新人，冇諗過咁快可以唱自己主演嘅電影主題曲，所以就更加開心。錄音嗰陣，監製喺開頭試音時係高估咗我，Set到個key好高音，o依家大家聽到嘅版本，係降低咗五個keyo架！」

提到新歌，Jennifer希望可以同電影一樣，為大家帶來正面訊息，遇到任何困難都唔好忘記快樂。「大家可能會覺得個天好唔公平，努力同回報唔成正比，會好灰心，埋怨個天，有時我哋追求緊一啲嘢時，會忘記咗快樂，但到最後你會發覺，其實做人最緊要就係點樣去開心，最緊要係記得笑，就好似呢首歌咁，你嘅世界每一日都充滿陽光。」

講到喺戲中素顏上陣，Jennifer直言當時係一口答應。「導演初頭同我講唔使化妝，我即刻應承，本身我對自己皮膚嘅情況好有信心，素顏上鏡之前雖然冇乜點試，但作為演員，我冇咩所謂，個樣靚唔靚，要肥要瘦，或者專登化妝再醜化自己都好，我都ok嘅！最緊要係似番個角色，做到個角色就好嘞。」

兼唱電影主題曲嘅Jennifer，為咗演繹學生角色，同導演去補習社、學校觀察唔同學生嘅神髓，做足功課。

Jennifer喺葉童、King Sir身上，獲益良多。

 

巨石五豐收（$118），以五穀米炮製嘅素炒飯，營養價值甚高。

口水雞腿菇（$68），以炮製口水雞製作，相當特別。

手足情深

至於男主角岑珈其，喺佢十六歲出道時喺《烈日當空》中飾演學生，一路演出過唔少叛逆少年角色。「今次我飾演本性善良嘅叛逆中學生珈豪，喺歐錦棠飾演嘅老師嘅鼓勵同幫助下，終於找到自己，積極追求夢想，成功蛻變。」

珈其喺戲中演繹咗角色唔同嘅性格，同埋複雜嘅心理轉變過程，「我喺戲入面有一個智障嘅細佬，係由素人演員謝珈朗演出，我哋係一對嚟自基層家庭嘅兄弟，都好手足情深，珈朗做得好好。」

除咗主角，一眾綠葉都係實力派，葉童同張國強飾演Jennifer嘅父母，而戲骨鍾景輝King Sir則飾演佢嘅外公。「戲入面我嘅父母關係緊張，唯獨外公最了解我，一家人係『這麼近那麼遠』嘅關係，戲外我就喺咁多位前輩身上，得到好多寶貴經驗，學到好多嘢。」

入行以來，雖然珈其大多演出年輕學生，但佢對演戲充滿熱誠，正積極拓展戲路。

珈其同Jennifer分別代表邊青同尖子，兩者同樣值得社會關注。

谷祖琳喺戲中係另一位重要角色，令一眾「特殊兒童」能夠成功演出音樂劇。

水煮豆腐（$158）係一道有性格嘅素菜，麻辣滲透入豆腐之中，令人食唔停口。

酸菜桂花魚（$210），魚肉鮮嫩，極具特色。

拔絲蕃薯（$98），外脆內軟，甜味啱啱好。

面譜京川料理
地址：尖沙咀港鐵尖東站33號舖
電話：23119233