為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 10 月 06 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

品牌時代

時代集團(1023)嘅起步同好多香港上一代企業家好相似,由家庭式代工廠做起,到後來自置廠房為歐美大牌生產手袋,可以話係獅子山下白手興家嘅典型例子,亦係兩兄弟打天下嘅故事。至於公司喺二○一一年進軍手袋皮具零售業務,由一個牌子到今日七個品牌,中港共五十幾間門市,可以話係兩代人一齊推動企業轉型,亦反映公司嘅薪火相傳。

公司剛公布截至六月底全年業績,營業額增逾兩成至二十三點一億元(港元,下同),純利亦升近兩成二至近二點六億元。我早排搵時代集團主席楊華強上《人生交叉盤》講吓業績,楊兄好高興分享公司零售業務近年有好多突破,佔總營業額比例已經由當初百分之一增加到一成四。睇返業績,零售分部營業額升近九成八,稅前溢利更係舊年嘅四倍九。廠家轉型做零售唔容易,難怪楊兄咁安慰。

目前時代集團旗下有七個牌子,分三大類,包括奢侈、中價及年輕產品。楊兄提到,公司過去為一個意大利品牌做大中華區獨家代理,目前進而洽購呢個牌子,原因係公司冇呢類型產品,而從過去合作中對品牌加深認識,確認收購可以令公司嘅品牌組合更加完整。公司打算喺未來三年擴大零售至整體業務量五成,建立合適嘅品牌組合確實重要。
由代工走向零售,好處自然係較主動,邊際利潤更高;而走向品牌,主自性更加強,亦能為企業創造更高價值。好似Interbrand二○一七年全球百大品牌榜頭兩位蘋果和谷歌,品牌價值分別係一千八百億美元和一千四百億美元,加埋接近等於香港舊年GDP(世界銀行:三千四百億美元),品牌威力毋庸置疑。

但另一方面,進入品牌時代,面對嘅市場和營商變化更大,時代集團點樣駕馭改變?呢點要數到公司第二代班子嘅加入。楊華強和弟弟楊和輝(行政總裁)仔女分別加入公司,喺零售、營銷、電商等不同崗位上發揮年輕一代嘅創意。不過,後輩話同父叔輩合作,原來要當佢哋係「客」,好似之前打工咁,要向客解釋清楚marketing、客戶體驗、電商做法等等,要父叔buy in至可以衷誠合作。當然,後生仔女都要從錯誤中學習,好似最初做零售,產品屬中價輕奢侈品,但佢哋為求做好,門面做到好靚,店員反映好多客以為貨品好貴唔敢入嚟。後來佢哋作出改動,將設計改得潮啲親民啲,等客人放心入門口。

兩代管理人處理問題嘅方法都有唔同。好似公司喺八十年代面對香港工資飛漲、人手缺乏,兩兄弟就決定將廠房北移。到咗今日,後生一代面對同樣問題,會考慮在生產方面加入自動化工序,以及改善工作環境和晉升制度等方法。公司又引入透明度極高嘅工資系統,工人可以上網查看即日個人生產是否達標,攞唔攞到獎金,令工作更有動力。畢竟後生仔最了解新一代員工。

時代集團手袋王國嘅成功得來不易,寄望後生一代可以承先啟後,開創另一個時代。

時代集團的發展像很多典型的香港企業,由家庭式代工廠做起。(圖為主席楊華強(右)、行政總裁楊和輝(左)與陸叔(中)合照。)