港姐狼狽走人
每逢喺選美之後，啲得獎嘅港姐都會頻頻出席唔少公開活動，接受各大小贊助客嘅禮物。早前，東姑就喺銅鑼灣，巧遇今年嘅港姐冠軍陳曉華、亞軍鄧卓殷、季軍丁子田，同埋友誼小姐陳靜堯，一齊去到一間化妝品公司領取獎品。
點知離開時，街外忽然落起滂沱大雨，原本着到靚靚嘅佢哋，惟有除咗高跟鞋，換上波鞋或涼鞋，方便涉水。不過，就算門口已經stand by咗一架公司車接載佢哋；之但係，喺呢一段咁短嘅路程，佢哋都差啲濕晒身，仲要勞煩工作人員擔遮送佢哋上車。
期間，一個二個更加要抽起條裙行，深怕整濕裙腳；而佢哋個樣都幾咁楚楚可憐，兼且幾狼狽吓，只怪佢哋貴人出門招風雨囉。
為咗方便大雨下涉水，友誼小姐陳靜堯都換咗波鞋。
雖然短短哋一段路程，但佢哋一個二個抽高裙腳上車，亞軍鄧卓殷睇落都幾狼狽。
冠軍陳曉華由男工作人員擔遮護送上車，睇落最為滋油淡定係佢，不愧係冠軍級人馬。
