為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 09 月 30 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

突破新起點

要作出突破,最重要係有勇氣跳出Comfort zone,繼續挑戰自己,先會有意想不到嘅收穫。今次「Paco巨星飯堂」嘅三位嘉賓:林利、朱紫嬈(Khloe)同蔡潔(Jackie),都喺早前同「邵氏」簽約,成為旗下藝人,轉換新環境後,三位重新出發,尋求突破。

我帶佢哋去到位於中環嘅「營致會館」,品嘗新式高質粵菜,暢談發展嘅新路向。

Khloe、林利同Jackie(左至右)先後加盟新經理人公司,繼續喺演藝道路上,尋求突破。

 

挑戰新環境

人生總需要一啲新衝擊,先會激發到更多潛能,今次三位嘉賓亦不例外,所以佢哋就加盟新經理人公司,喺新環境尋求突破。

林利表示:「今次返嚟香港定居,我仲想發展自己嘅演藝事業,所以同邵氏簽咗五年,我相信佢哋可以幫我喺演戲上,搵到更多好機會。啱啱拍完劇集《鐵探》,嚟緊又要去台灣拍另一套劇集,巧合嘅係,我喺呢兩套劇入面都係飾演殺手,可能我嘅外型比較Cool啦!」

Khloe就話:「我希望有多啲演出機會,新公司有好好嘅配套,可以俾我喺演藝同歌唱上,有多啲渠道去呈現自己。最近我就出咗Hifi發燒碟,所以都全力做緊宣傳活動。」

而Jackie就再同影帝古天樂合作,「我喺古生身上學到好多嘢,就算係啱啱喺電影《犯罪現場》再同佢合作,都仲有新嘢學到,合作過幾次,o依家我有咩問題,都會好大膽咁問佢,而佢又好照顧後輩,一定會解答我嘅問題。

「至於簽新公司,係因為之前喺太陽嘅時候,好多同事、老闆,仲有Paco都好錫我,所以我覺得要做番啲成績出嚟,唔好辜負你哋對我嘅栽培。」

我帶三位嘉賓去到位於中環嘅「營致會館」,品嘗新式高質粵菜,暢談發展嘅新路向。

 

經過數度合作,Jackie已視影帝古天樂為老師,演戲上有咩疑惑都會向佢請教。

 

即將推出發燒碟嘅Khloe,新碟以紀念陳百強為主題,精選Danny嘅金曲,重新演繹。

 

XO醬脆煎腸粉($88),由腸粉到XO醬俱屬餐廳自家製,腸粉炒得出油炸效果,極考廚師工夫。

 

珊瑚芙蓉蝦球皇($380/位),選出越南虎蝦製作,蝦球處理成花型,盡顯刀工;配上味道較濃嘅蒸蛋白及蟹王,更見與別不同。

 

香蔥爆乳龍($380/位),特別挑選重六至八両嘅BB龍蝦,經高溫油炸後回鑊,製作出外脆內juicy嘅效果。

 

作雙線發展

哈哈哈!有實力就一定可以做出成績!Jackie加盟新公司後,除電影外仲會挑戰一下電視劇演出。「雖然我仲係以電影為主,但會多元化少少,如果電視劇有啱嘅劇本,我都想試吓,好似做古裝劇咁,我都未見過自己古裝嘅造型,希望會俾人一種耳目一新嘅感覺。」

喺宣傳新碟嘅同時,Khloe都有挑戰節目主持嘅工作。「我就嚟入行十年,之前大部份時間都係專注喺唱歌上面,o依家就多咗電視嘅平台,俾觀眾認識我多啲,而我喺主持節目嘅同時,都增值緊自己,嚟緊就希望有多啲演戲嘅機會,作多方面發展。」

Jackie同Khloe同時作雙線發展,前者除固有嘅電影演出外,仲會挑戰拍劇;後者就會成為歌、視雙棲女星,新作令人期待。

 

繼續唱歌事業外,Khloe(左二)仲挑戰主持工作,與狄易達(左一)、單文柔(右一)主持節目《安樂蝸》。

 

演戲以外,Jackie趁夏日都嘗試近期大熱嘅無繩滑水,有姿勢有實際。

 

摩利菌上素石榴球($69/3件),石榴球內為摩利菌及素菜,加上金箔更顯矜貴。

 

官燕芙蓉鳳眼餃($90/3件),蝦餃配上珍貴官燕,進化成2.0版本。

 

浪子愛.回家

雖然林利好似係兩位女嘉賓嘅前輩,但佢話自己仍在學習中。「我八九年就去咗台灣住,到近年先返香港,喺外面飄泊得耐,返到嚟屋企,全部嘢都要重新適應,拍戲可以令我快啲習慣o依家嘅生活,我都好enjoy。」

講到「愛.回家」,林利話:「因為媽媽年紀大,所以我想返嚟照顧吓佢,休息嘅日子除咗照顧媽媽,我會跑步、行山,我好鍾意戶外活動,所以曬到咁黑。」

今年初接受直腸癌治療後,林利仍然保持狀態,佢話飲食上一向清淡。「就算病之前,我都唔係冇規律嘅人,亦都好少大魚大肉,可能嗰時初初返到嚟香港,唔係太適應生活節奏,令自己有好大嘅無形壓力。o依家運動同工作,都係我減壓嘅方式。」

林利曾居於台灣長達廿幾年,為照顧媽媽而「回家」嘅佢,仍醉心演藝工作。

 

林利嘅皮膚比昔日黝黑,全因佢熱愛戶外運動,跑步以外,行山係佢另一keep fit方法。

 

脆香貴妃雞(半隻$280/一隻$560),以高湯浸泡新鮮本地雞,煮熟後再用特別方式封乾一日,侍客前再以油炸,脆皮薄如蟬翼,肉質鮮嫩。

 

香蔥頭抽爆鹿兒島A4和牛($1,180/10安士),先以西式煎牛扒方式,鎖住和牛肉汁,再以傳統粵菜烹調方法處理,仍保持牛肉獨有美味。

 

黑魚子原隻鮮鮑伴螺片海紅葉($380/位),集四國食材於一身嘅冷盤:俄羅斯黑魚子、南非鮮鮑魚、日本螺片及浙江海紅葉,四種食材配搭得精采絕倫。

 

營致會館
地址:中環干諾道中41號盈置大廈地下G05、107及108號舖
電話:28016882