為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2018 年 09 月 22 日

王浩信 唐詩詠樓梯桑拿鬥爆汗

王浩信同唐詩詠呢對老拍檔,最近再喺新劇《解決師》合作,都一樣係發展感情綫;不過,由於劇情玩犯罪懸疑,同之前《不懂撒嬌的女人》嗰種辦公室愛情截然不同,所以佢哋都話唔驚觀眾睇到悶咁話。

早前,東姑就喺九龍城遇上佢哋為《解》劇拍外景,需要喺一棟舊唐樓跑樓梯,可憐呢個大熱天時,仲要撐上撐落,樓梯啲通風又嚴重不足,就好似着住衫焗桑拿,認真叫苦連天!東姑現場所見,佢哋每拍完一場,落到樓即刻要索番大啖氣之餘,仲大汗叠細汗,搞到工作人員都要不停幫佢哋抹汗同補妝。估唔到開工時嘅專業態度,呢對老拍檔都一樣咁夾,吓吓認真拍嘢,跑條樓梯都唔會隨隨便便「揸流攤」o架!

同場仲有爆肌小鮮肉丁子朗,劇中佢扮演一個學生哥,可能早前《森美旅行團》熱播,令佢人氣急升,現場見有唔少哥哥、姐姐輩嘅街坊,猛(目及)住佢拍戲,搞到佢都有啲唔自在。睇嚟,佢要向在場嘅兩大前輩王浩信同唐詩詠,好好學習,點樣應付呢啲場面,而又可以專業咁投入拍攝喇!

由唐樓嘅樓梯跑出嚟嘅王浩信,已焗到成身大汗,要勞煩工作人員幫佢抹背,免汗漬喺恤衫現形。

 

跑完樓梯嘅唐詩詠,個樣好似索晒氣咁,更慘係着住高跟鞋,同埋一件背心外套。

 

出到街之後,佢都事不宜遲攤開外套唞涼,仲猛唞大氣,睇嚟幾辛苦吓。

 

熱到妝都溶埋嘅唐詩詠,急忙印汗同埋補妝,趕住下個鏡頭埋位,又再搏殺過。