為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 09 月 23 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

友情勝黃金

人生能夠有相知廿載嘅好兄弟,已經難能可貴,有唔止一位好兄弟,就更加彌足珍貴!錢嘉樂就有鄭伊健、陳小春、謝天華同林曉峰四個老友,五兄弟除咗相交廿年,仲一齊衝鋒陷陣,喺即將上映嘅電影《黃金兄弟》中,將真.兄弟情融入電影。

得到監製曾志偉嘅全力支持,嘉樂仲親自執導,今次「Paco巨星飯堂」,我就邀請兩位,去到位於九龍城嘅「泰皇閣」,品嘗特色泰式料理,細說今次重金炮製嘅大製作。

喺身兼監製、演員兩職嘅志偉全力支持下,嘉樂事隔十五年後再執導演筒,炮製《黃金兄弟》,加埋一班真實好兄弟伊健、小春、謝天華同阿Lo嘅賣命演出,確實令人期待。

 

十五年一導

嘉樂對上一次執導嘅電影作品,已經要數到〇三年嘅《無問題2》,今次除咗係佢闊別十五年嘅新作,仲有一眾兄弟拍住上,佢話:「真係要多謝獎門人,係佢促成咗呢件事。我哋幾兄弟自從《古惑仔》系列之後,都冇再一齊拍戲,就算係開show,都唔係嗰回事。今次係我同獎門人傾過古仔之後,佢好快已經搵到人寫劇本,仲有全力support,所以一定要多謝佢。」

監製志偉即刻接話:「嘉樂講得啱呀,兄弟情係香港電影嘅標誌之一,所以喺古仔方面要有啲特別,今次個古仔就講,一家人入面有其中一個誤入歧途,做咗傷害屋企人嘅事,咁其他人係包容佢,定係放棄佢吖?

「至於支持嘉樂做導演,係因為我一直覺得佢好有潛質,但係冇乜機會俾佢發揮,咁一係唔支持,一撐就要撐到底,我同個製片講,導演要咩就滿足佢,等佢死得眼閉!」

哈哈哈!咁有才華嘅導演,梗係要大力支持,但係志偉都有猶豫嘅時候。「去匈牙利拍外景,我一去到布達佩斯,見到淨係武師都有成六十人,加埋主角同其他crew就成百人,又要封街封橋去拍,一日又要俾成百萬!我問個製片咩事,佢話係我話咩都要滿足導演,就搞成咁嘞!」

我帶兩位貴賓去到位於九龍城嘅「泰皇閣」,品嘗特色泰式料理,細說今次重金炮製嘅悅目兄弟情。

 

五個好兄弟嘅廿載情誼,緣起大銀幕,再伸延至舞台,到今年回歸大銀幕,實在難得。

 

 

 

生蝦刺身($98/例),配上秘製醬汁,更見鮮甜。

 

泰皇秘製鰂魚沙律($172),將原條鰂魚拆肉,經油炸後配上沙律,魚肉外脆內軟。

 

白灼螄蚶($80/例),罕見地以白灼方法製作,甚有特色。

 

Gay Film變奏版

除咗布達佩斯,嘉樂仲帶埋團隊去內蒙古、日本、台灣同黑山等地取景,咁大型嘅製作,總共耗資二億。導演話:「有一幕講伊健同對頭人喺日本街頭飛車,為咗特別啲,我就揀咗兩款冇喺同類型電影出現過嘅跑車,有Sky哥哥揸,就滿足晒fans嘅幻想。

「但係實行起嚟有啲難度,因為我仲要準備另一架用嚟撞嘅替身車,而技術上又好難做到,好彩到真係要拍之前,架車搞掂咗仲運埋過日本,場戲都拍得好順利。」

雖然飛車、動作佔戲甚多,但主軸仍然係兄弟情,志偉話:「咩兄弟情呀?睇完齣戲我以為係gay film添呀!佢哋五個痴纏到呢⋯⋯淨係傾整唔整死變壞咗嗰個兄弟,佢哋同我傾到喊晒口。去溫泉拍外景,五個分開瞓唔得o架,係都要迫埋喺一間房,玩疊羅漢咩?」

除咗促成電影嘅製作,志偉仲飾演重要角色,面對導演嘉樂嘅「燒錢」拍攝方式,佢依然全力支持,佢笑言:「要佢(嘉樂)死得眼閉!」

 

除咗促成電影嘅製作,志偉仲飾演重要角色,面對導演嘉樂嘅「燒錢」拍攝方式,佢依然全力支持,佢笑言:「要佢(嘉樂)死得眼閉!」

 

 

 

泰式燒羊架($140/四件),羊架經秘方醃製,滋味無窮。

 

爆炸蝦($218/例),以秘製香料炮製,做出入口「爆炸」嘅效果,又保持大蝦嘅鮮味,屬考工夫嘅菜式。

 

重量級爆破

監製除咗全力「撲水」支持,喺戲中都係舉足輕重,志偉飾演五位兄弟嘅「阿爸」,嘉樂話:「呢個角色冇可能唔係獎門人做,佢初初話只係做監製就OK,但係冇咗佢真係唔得。」

身兼監、演,志偉連搵景都做埋。「嘉樂話要去黑山拍,因為當地嘅山景有一種無路可退嘅感覺,咁啱我有朋友喺嗰度開度假酒店,仲係七星級嗰隻。人哋難得肯借場俾我哋拍,導演又要炸人哋條橋喎!」

導演即刻解說:「條橋係連接陸地同度假酒店所在嘅小島,我哋就喺嗰度拍重頭戲,為咗呢場戲,我哋喺歐洲其他地方,運咗唔同種類嘅軍火去拍攝現場,要喺唔破壞原有環境嘅情況之下拍,炸橋係有後期特技o架。」

再次執導,嘉樂不論係處理拿手嘅飛車動作場面,定係交代兄弟情嘅文戲,都一絲不苟,作品可謂係佢同一眾兄弟嘅心血結晶。

 

 

 

戲中嘅重頭爆破場面,遠赴黑山嘅頂級度假勝地取景,嘉樂仲特地喺其他國家運送重型武器到拍攝現場,誠意十足。

 

泰式炸豬手($158),經油炸後嘅豬手,肉汁仍然豐富,值得推介。

 

泰式煲仔翅($138/細),啖啖鮮味。

 

咖哩炒膏蟹($310/例),膏蟹同咖哩互相配合,更令人難以停口。

 

泰皇閣
地址:九龍城衙前塱道15號地舖
電話:23820900