為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 09 月 16 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

圓夢孫言

有夢想,唔止唔係鹹魚,仲會有成真嘅一日!孫耀威(Eric)就係最新「幸運兒」,即將喺十一月舉行個人演唱會嘅佢,終於一償入行廿多年嘅心願,擁有真正屬於自己嘅舞台。

今次「Paco巨星飯堂」,我帶Eric去到位於灣仔嘅「享福」,品嘗特色嘅川菜,細說佢嘅圓夢旅程。

雖然入行多年,但Eric嘅童顏仍然未變,真係令人羨慕。

 

償廿載願

首先要恭喜Eric如願以償!期待咗咁多年,終於喺香港舉行第一次嘅演唱會。佢立即意味深長咁話:「係呀!等咗廿幾年嘞!我睇番當年我喺台灣出碟嘅時候,嗰時啲第一代唱片,封底好興問嗰啲你有咩花名、鍾意咩顏色,其中有一個係問我嘅心願係乜,嗰時我已經寫,希望可以喺香港開個人演唱會。

「但咁多年嚟,我成日都離開咗香港,因為一開始我嘅公司係台灣嘅公司,佢哋好少將我嘅基地擺喺香港。轉轉折折到今年,我轉咗新公司啦,咁新公司嘅老闆就問我有啲咩想做,我見係一個新嘅開始,就話:『咩都唔使講!搞show!』。我仲話邊度有場地就擸咗佢,呢個演唱會再唔開嘅話,我就好似便秘一樣,所以就促成咗我呢個show。」

身體力行,Eric由決定開show前,已經做足準備工夫。

「係呀,我無聊到喺電腦整埋個PPT(PowerPoint ),自己剪啲相落去,搞到好似啲人去見工嗰啲resume、proposal咁,所以其實好多嘢已經喺晒我個腦裏面。o依家實行起上嚟,就有一個比較特別嘅,我最近好積極去練滾軸溜冰。因為我細個嗰時好鍾意玩,我好記得喺台灣出道嘅時候,第一個騷,就係着住roller行出嚟跳溜冰舞。

「嗰陣我係一個死o靚仔,一出到場好淆底,對腳係震住咁樣出去o架。如果我真係着住對波鞋跳舞嘅話,我諗我會震到跳唔到,但反而係嗰幾個轆,令我覺得好似我平時去緊嗰啲溜冰Disco玩咁,就完成咗第一首歌。我好想將呢一幕喺香港做一次,所以最近就每日健身差唔多三個鐘,夜晚再去維園嘅滾軸溜冰場,練番啲基本動作。我廿年冇踩過嘞,着番對鞋練番啲基本動作,再慢慢玩少少花式。我又有自己嘅西裝生意,都想演唱會有一部分嘅服裝,係我自己設計。」

我帶Eric去到位於灣仔嘅「享福」,品嘗特色嘅川菜,細說佢開show背後嘅故事。

 

為咗呢個「處男演唱會」,Eric費盡心思,務求令自己同粉絲都滿意。

 

重慶口水雞($220),辣味啱啱好。

 

香煎蓮藕夾($220),香脆嘅蓮藕夾住肉餅,佐酒之選。

 

五歲「斷片」

Eric嘅「處男個唱」,取名都極有心思,「我係一個幾癲嘅人,今次個演唱會叫『Hysteric Live』,『Hysteric』有『Eric』啦,至於呢個字嘅意思係歇斯底里,其實同我好似,所以我由好細個用ICQ嗰陣,已經用『Hysteric』o架嘞!識我嘅朋友都知,私底下嘅我係好癲狂嘅,食嘢可以一餐食七碗飯,鍾意我就一晚食七斤蝦或者兩打蛋撻。」

哈哈哈!估唔到Eric可以去到咁盡,咁真係要了解吓嘞!「我細個已經同爸爸飲啤酒食晚飯啦,嗰時我五歲,我唔記得爸爸走去廚房攞啲乜,媽咪又冇為意,我就真係隊晒一杯滿嘅啤酒,跟住佢哋問我做咩,我話:『哦,冇嘢呀。』點知行到廁所門口就砰一聲瞓低咗。之後讀大學就冇王管啦,一話要飲酒,啲師兄師姐就話係競飲大賽,一定要贏其他學系,咁我就自告奮勇啦。之後佢哋就講,我咁飲法會斷片,我問佢哋咩係斷片,原來就係飲到喪失記憶。我諗都要試吓,當然都如願以償啦,點返宿舍我都唔記得咗嘞!」

o依家Eric每日做三個小時gym,再練習滾軸溜冰,非常充實。

 

 

 

蒜泥白肉($160),惹味!

 

松茸燉雙耳($120),四季啱飲,滋補養生。

 

白菌釀焗蟹蓋($160/隻),鮮甜美味。

 

老婆加持

當你一行出台,聽到全場嘅掌聲嘅時候,就係另一個孫耀威嚟o架嘞,係表現滿分嘅孫耀威!預祝你成功!最重要嘞,為咗籌備呢個演唱會,喺飲食方面有冇咩要充實自己?

「如果講精神上嘅充實,就一定係亂食啦!令到身體充實呢,就乜都唔可以食嘞!好彩我嘅健身教練都有人性一面,因為我o依家攤長去做,佢話唔需要太過hardcore嘅,例如有一日真係好想食辣,嗰日咪食少少辣囉;真係想飲杯紅酒,咪飲杯紅酒囉,之後操肌操番佢咪得囉。我o依家係建肌階段,係build緊肌肉,所以就食得多嘅,牛扒呀各樣嘢我都照食,有陣時油膩嘅炸雞髀,我都照食嘅。但係六點後,碳水化合物同頭先講個啲油炸嘢、甜品全部唔食得嘞。

「過多一個月之後,過咗建肌期,就到減脂期,建完肌肉之後就減脂肪,呢個階段就真係最慘嘅。因為就係食白灼雞肉,鹽都唔准落多滴,汽水就唔使諗o架嘞!我老婆好好,佢整咗一啲超級energy嘅飲品俾我,裏面加咗藜麥同各種嘅氨基酸,總之係天然嘅全部,飲一杯落去就可以頂肚餓又有能量,佢仲加埋鈣同維他命ABCDE,全部加咗落去,仲話:『呢杯super drink嚟o架,好貴o架!你要飲晒佢呀!』但就好難飲囉。」

努力操肌,Eric話到時如果反應熱烈,唔排除會即場騷肌肉,展示操練成果。

 

同太太Macy拍拖多年,結婚一年後更見如膠似漆,開show又有愛心能量飲料「加持」,Eric仲唔充滿力量咩?

 

陳皮話梅骨($180),外脆內軟,外皮帶陣陣陳皮香。

 

麻辣水煮老虎斑球($660),魚肉嫩滑,麻辣程度恰到好處。

 

潮式蝦乾蟹肉炒米粉($280),蝦乾嘅鹹香更能突出蟹肉嘅鮮味。

 

享福
地址:灣仔軒尼詩道33號皇悅酒店地庫LG2
電話:28612060