向海嵐人肉招牌

〇二年，同陳妙瑛一同主演《無頭東宮》嘅向海嵐（Anne），奸到出汁，為一己私慾同好姊妹換面，又為保住貴妃之位做盡壞事。當年，佢憑呢套劇集，演技令大家刮目相看；不過，〇八年佢就突然退出娛樂圈，隻身跑到上海，喺一個大集團擔任市場公關，事業重新發展。

最近，東姑喺一個飯局撞到Anne，佢話自己已經全面回流返嚟香港。o依家，佢除咗做舞台劇同音樂劇之外，仲同一位珠寶設計師朋友，創立咗一個珠寶品牌，並主攻翡翠首飾。當晚，佢仲佩戴咗自家品牌嘅首飾，做人肉招牌，畀成班朋友欣賞一吓添。佢話畀東姑知，因為飯局之後要見客，所以帶多咗一套出嚟，更加畀東姑先睹為快，咁東姑當然要供諸同好啦！

Anne同東姑講解，呢一對耳環上嘅大象，係「萬象更新」嘅意思，又因為象常用鼻吸水，所以又代表吸財納福，用料方面係翡翠、紅寶同鑽石。

至於呢款耳環，綠玉象徵石頭，而上面嘅冰玉花燦爛盛放，代表唔理身處何地，都要綻放鮮花，寓意生命力不屈不撓，用料係綠玉、冰種玉同紅寶。