周潤發出巡街市派魚蛋

被封「民間特首」嘅周潤發（發哥），向來親民冇架子，「野生捕獲」過發哥嘅市民，無不對佢嘅人品有讚冇彈。

早前，東姑就喺九龍城街頭巧遇發哥，佢正為內地著名主持人魯豫嘅節目《魯豫有約大咖一日行》錄影。攝製隊跟住發哥四圍去，一齊感受佢嘅日常生活，好似行吓街市、歎吓地道小食咁。而出晒名「貼地」嘅發哥，最常出沒九龍城，仲同唔少檔主識落幾廿年，大家friend過打band，呢區名副其實係佢主場啦！

東姑現場所見，佢嗰日出巡，場面一樣咁墟冚，習以為常引來唔少途人圍觀，大家都想一睹發哥的風采。難得佢仲不斷發揮親民本色，去到蛋撻店就通街派蛋撻，去到街市賣魚蛋舖，又即場向街坊大派魚蛋，好似幫啲舖頭老闆推銷，一樣咁落力。而鏡頭以外，東姑就見到發嫂（陳薈蓮）全程喺度做「跟得夫人」，默默陪住老公拍嘢之外，仲幫手挾吓魚蛋遞畀老公派街坊，認真恩愛喇！

貴為巨星嘅發哥，當街篤住粒魚蛋派畀街坊，好似幫舖頭老闆hard sell咁，非常落力。

親民嘅發哥一邊接受魯豫嘅訪問，一邊招呼圍觀嘅街坊，向大家大派魚蛋。

鏡頭以外，發嫂默默陪住發哥錄影，仲喺後面幫手遞魚蛋添。

呢間老字號蛋撻店，發哥幫襯多年，而佢仲捧埋一大盤出爐蛋撻，派畀大家品嚐。

主持人魯豫有發哥做嚮導，教佢揀新鮮靚榴槤，一齊食到津津有味。

發哥帶住主持人魯豫，去到佢九龍城嘅主場，行吓街市買吓餸，體驗佢嘅平民化生活。

 

鶼鰈情深嘅發哥同發嫂，經常形影不離、秤不離砣，發嫂仲跟埋錄影做「跟得夫人」。