為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 09 月 15 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

創興銀行、越秀和廣州地鐵合組鐵三角

講起創興銀行(1111),好多投資者都應該記得,香港銀行界第一位女大班梁高美懿喺恒生銀行退休後,在二○一四年接受越秀集團邀請出山掌舵,經過四年順利過渡,梁太亦都功成身退。我在九十年代已經認識梁太,喺呢度藉機會祝呢位女強人退休生活愉快。

創興銀行委任宗建新為行政總裁兼副主席後,馬不停蹄,公布中期業績同日宣布獲廣州地鐵集團以約十億港元認購逾七千萬股新股,佔經擴大股份總數百分之九點七,認購價十四點二六港元,較最後交易日收市價輕微折讓百分之二點九九。創銀並以同一認購價按二供一基準進行供股,越秀金融及母公司越秀集團已承諾認購,將為供股投入至少三十億港元,以示支持和信心。

我比較有興趣了解廣州地鐵入股後有冇後着,以及同創銀有乜嘢協同效益。其實越秀集團喺二○一六年四月已經同廣州地鐵簽訂戰略合作協議,廣州市兩大國企正式建立夥伴關係,喺房地產、金融、交通各自優勢上相互合作;之前雙方曾合作為地鐵進行境外融資,以及聯手設立廣州城市更新基金。入股之後,創興銀行、越秀和廣州地鐵會組成鐵三角,可尋求多方面嘅協同合作。

創銀過往以香港為發展重點,但隨住粵港澳大灣區發展,分行和支行網絡現已覆蓋廣州、深圳、佛山、南沙、橫琴、澳門等地。另一方面,越秀集團喺廣州嘅根基同地位固然唔使多介紹,廣州地鐵背景亦好雄厚。有二十六年歷史嘅廣州地鐵,除咗建設和管理廣州市軌道交通系統之外,仲經營物業開發和拓展其他產業,現時業務涵蓋軌道交通產業鏈上下游二十幾個行業。

創銀和廣州地鐵最直接嘅協同合作當然係融資。截至二○一八年廣州地鐵融資規模達到九百四十九億元(人民幣,下同),其中三百六十三億元係銀行貸款。展望未來五年地鐵建設及償債資金總需求將超過二千八百億元,相信創銀可以喺跨境融資和財務顧問等方面謀求參與和合作。而廣州地鐵沿線土地資源價值如得到發揮,還款能力應該非常可靠。

另外,廣州地鐵上下游覆蓋軌道交通、先進製造業、建築、房地產、服務等二十幾個行業,日後可以協助創銀喺產業鏈上開拓企業和個人客戶,發掘供應鏈金融和高端零售服務嘅機會。

再落去更廣泛嘅零售層面,廣州地鐵共有十三條線共三百九十二公里長嘅鐵路,線網里程全國排第三,世界前十,每日平均客流量八百零八萬人次。創銀日後獲得零售業務牌照之後,可以通過廣州地鐵建立網點、直銷銀行、ATM等,接觸廣泛零售客戶。

我相信越秀、廣州地鐵加上創銀,可以成就一段共贏嘅三角關係,喺城市更新、軌道交通、物業發展、金融業務方面攜手合作,更期望創銀積極發揮協同效應,進一步發展跨境業務。

廣州地鐵入股創興銀行,連同創銀的股東越秀,相信會形成共贏的三角關係。