鄭秀文（Sammi）與許志安（安仔）這段跨世紀之戀，為人津津樂道，在娛樂圈中堪稱傳奇。廿七年來經歷離合之後，是甚麼驅使他們「千年如一日」相依相擁愛下去？是愛？還是責任？答案肯定係愛呀！

向來鮮有剖白夫妻間相處的甜蜜點滴，這次Sammi激罕大爆，安仔對她的窩心呵護，小至送上一包暖笠笠的「雞蛋仔」；大至對外父、外母關懷備至，主動提出跟她的父母同住，Sammi甜入心、冧爆激讚老公說：「喺我自己都未諗爸爸媽媽日後再老啲嘅生活點樣，由邊個take care佢哋時，佢（安仔）已經提出搬返去同佢哋一齊住，分擔照顧佢哋，呢樣係好愛屋及烏嘅事，真係好大嘅愛！」從前有「廚房宣言」，現在有「同住告白」，相濡以沫的愛情，絕對勝過任何甜言蜜語！

Sammi接受本刊訪問，真情剖白她與安仔的夫妻相處之道，還甜絲絲冧爆兩人的甜蜜點滴，認真sweet到漏！

相處二三事

鄭秀文（Sammi）最近推出新曲加精選唱片，主打歌〈千年如一日〉，講述永恆的愛，無論相愛多少年，仍然愛得像最初。像她與許志安（安仔）的關係，始於二十七年前，時間雖然長，但感情卻保持新鮮，應該很貼切歌詞。「我哋比較特殊，一齊好多年，跟住分開過，再復合一齊。所以相處上好熟悉對方，同時又要重新適應。尤其是真正一齊住之後，需要重新認識對方嘅生活習慣。阿安本身係一個好容易相處嘅人，雖然我o依家都OK易相處，但比較上我係變化多啲，而佢就一向好平靜——始終女人情緒多啲起伏，我都承認我係惡少少嗰個，好在佢呢種EQ，某程度可以穩定到女人嘅情緒！」

Sammi與安仔攜手共度二十七年的愛情，有着老夫老妻淡淡然的幸福。年初，安仔感染流感入院，她便貼身照顧。

一時像「老夫老妻」的淡淡然，一時甜蜜如初戀，Sammi與安仔的相處，也常在平淡中找到小情趣。「我哋鍾意一齊睇啲好笑嘅Video，成日會上網睇啲低低BB、搞笑嘅短片。我覺得兩個人能夠令對方笑好重要，咁樣嘅關係先會長久同開心。呢個係佢影響咗我。另外，我哋互相影響嘅興趣，仲有做運動，我做運動嘅熱情，佢都感染到，現階段已經完全唔使叫，好多時進入自動模式，各自跟教練去操，而大家都好鍾意做運動，都係兩個人一個好好嘅共同話題。」

每對情侶或是夫妻，都有私「蜜」互冧的瑣碎生活事二三件，Sammi甜絲絲說：「好似有時對方攰嘅時候，幫對方按（摩）吓、整吓，或者攞部機震吓都有嘅。或者，佢知我鍾意食雞蛋仔，成日都會去一啲我鍾意嘅雞蛋仔舖頭買畀我食。其實，好多嘢佢都比較遷就我，譬如飲食喜好、約朋友咁；而相對嘅，我都好歡喜佢有自己嘅時間，佢去約啲男人做想做嘅嘢，食雪茄或者玩滑水乜都好，我覺得必須有各自嘅空間。」

愛屋及烏的安仔，對外父、外母一樣關懷備至，令Sammi深受感動，大讚老公窩心兼孝順老人家。