啤梨睇樓度蜜月

近年香港嘅樓價飊升，唔少港人都移師去海外買樓投資。早已喺香港置業嘅DJ啤梨（葉文輝），啱啱又娶埋老婆，有咗頭家，搵錢要多啲，人生計劃都要長遠啲。

日前，佢為檳城旅遊活動任司儀後，晚上即要趕飛去日本大阪，原來佢都有意喺當地置業投資。喺短短兩日一夜嘅行程中，佢同老婆睇咗五個盤，其中一個鄰近地鐵站嘅盤，都幾啱心水，一個二百呎嘅開放式單位，售價百幾萬港元。

事後，佢同東姑分享︰「呢次好似上咗個雞精班，打算買嚟放租，一年回報都成六、七厘，我o依家同太太商量，計緊數。其實，唔單止日本，我嗰日做個檳城活動，嗰度環境同啲樓都好吸引，或者同太太去檳城度蜜月時，順便睇吓。香港啲樓價太貴，真係買唔到。」做咗人老公，啤梨真係成熟咗好多。

由於有部份係樓花，佢哋不惜到當地考察，並到示範單位了解詳情。

同日晚上，佢已拖老婆飛去大阪睇樓，忙到連衫都冇時間換。

佢哋細心閱讀樓盤資料，以及聆聽地產經紀講解。

啤梨日前出任活動司儀，有意跟老婆去檳城度蜜月兼睇樓。