杜德偉體貼腳老婆

杜德偉（Alex）同細佢廿四年嘅嫩妻李曉冰（Ice）結婚六年，無論人前人後都咁恩愛。兩年前，Ice仲為Alex誕下麟兒小AJ，難怪佢對愛妻就更疼愛有加。不過就算有咗囝囝，兩公婆都不忘得閒「二人世界」吓，以增進夫妻之間嘅感情。

好似早前晚上約八點幾，東姑就喺中環ifc遇見Alex兩公婆，撇低囝囝去拍拖。當日，兩個都低調戴埋cap帽，喺一間西餐廳食燭光晚餐。離開時，Alex殿後埋單，不過，好快追番老婆，仲好溫柔拖住老婆隻手；然後，夫妻十指緊扣，前去停車場方向。

東姑所見，Ice唔知因乜解究，隻腳好似有啲「趷吓趷吓」，懷疑之前唔小心整親受傷，難怪Alex體貼緊張扶到實。而且，兩公婆一路行、一路仲幾好傾，感情好唔好絕對欺騙唔到人。而到咗停車場冇咁多人嘅位置，佢哋仲由手拖手，變得更加親密，轉為互相攬腰。就算Alex孭住背囊，Ice係都要攝隻手去老公背脊攬到實，恩愛之情，真係羨慕死人喇！

Alex同老婆Ice係年齡相差廿四年嘅老夫少妻，不過恩愛有加。

行路有少少「趷趷吓」嘅Ice，好似係整親腳，好老公Alex緊張拖住老婆，十指緊扣慢慢行。

兩公婆拖完又攬，邊行仲邊好好傾，似乎有源源不絕嘅話題。

行到停車場嗰陣，兩公婆見人少少，轉而互攬腰一齊行，Ice仲攝隻手入背囊後面，攬實老公。

囝囝小AJo依家兩歲大，Alex仲不時喺社交網，放閃父子嘅溫馨合照。