《延禧攻略》結局先睹為快

近期喺無綫熱播嘅內地劇集《延禧攻略》，網上已經播咗大結局，各位晚晚煲劇嘅劇迷，東姑可以「劇透」畀大家聽。話說皇后佘詩曼（阿佘）同弘晝合作謀逆嘅事被識穿咗，阿佘當場發難削髮，詛咒皇帝。佢原本死路一條，但係有瓔珞求情，最後唔使死只係打入冷宮。原來瓔珞咁做係為咗還人情，因當年瓔珞重病暈倒，係阿佘好心搵太醫救咗佢。之後，阿佘問瓔珞係用咩手段贏得皇上嘅愛，瓔珞嘅答案都幾發人深省：「皇后你一往情深，可為甚麼要告訴他？先說出口的人，就已經輸啦！」睇嚟瓔珞好識玩男女攻防戰喎！

最傷感嘅，應該係一直深愛瓔珞嘅傅恒病重戰死沙場，佢臨死都幫中咗毒嘅瓔珞搵到解藥，仲搵海蘭察傳話：「魏瓔珞，這輩子我守着你已經守夠了，下輩子，可不可以換你守着我？」而傷透心嘅瓔珞含淚回答：「好，我答應你。」似係向傅恒許下來世嘅約定。而劇中被喻為「Big boss」嘅太監袁春望，被揭發係先皇嘅私生子，太后求皇帝放佢一馬，結果佢被囚禁喺紫禁城，變咗癲佬。而另一個謀逆嘅皇帝細佬弘晝，就被賜毒酒再送返親王府等死。

到結局最尾一幕，終於睇到瓔珞同皇帝嘅happy ending。皇帝晉升瓔珞為皇貴妃，仲逼瓔珞開口講愛佢。兩人攬埋一嚿打情罵俏，瓔珞點都唔肯講愛皇帝，「皇上把江山放在第一位，卻要求臣妾最愛你，你可真是霸道。皇上剛才的問題，現在沒有答案，不過我會用一生來回答你！」暗示願與皇上廝守一生，好冧呀！

皇后阿佘成個怨婦咁指責皇帝，跟住仲用刀仔削髮詛咒佢。

被打入冷宮嘅阿佘，搵瓔珞「攤牌」，原來當年阿佘曾經救過瓔珞，所以瓔珞代佢求情，唔使佢死。

瓔珞指住個嘴，解釋畀皇后聽，點樣贏得皇帝嘅愛，原來「先講出口，就係輸家」。

中咗袁春望蟲毒嘅瓔珞，喺牀上嘔晒血，連名醫葉天士都話冇得救，危在旦夕。

最終，瓔珞得到傅恒搵到解藥救番，但係得知傅恒病重戰死沙場，瓔珞好傷心。

傅恒透過海蘭察向瓔珞傳話，希望下輩子輪到瓔珞守護番佢，瓔珞含淚答應，許下來生嘅約定。

犯咗謀逆大罪嘅弘晝，坐監時畀皇帝賜佢飲毒酒，算係應有此報。

「終極奸人」袁春望原來係先皇嘅私生子，喺皇宮搞風搞雨咁耐，最終報仇失敗仲癲埋。

皇帝賜封瓔珞做皇貴妃，跟住走嚟要瓔珞多謝佢，然後仲要逼瓔珞講愛佢。

兩人攬埋一嚿打情罵俏，仲暗示以後相愛廝守一生，大團圓結局。