為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 09 月 02 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

特技以外

最近無綫熱播嘅劇集,除咗《延禧攻略》,仲有本地製作、以年輕人為主嘅《特技人》。今次「Paco巨星飯堂」,我就邀請劇中並非飾演特技人嘅男女主角:關楚耀(Kelvin)同傅嘉莉(Kelly),細說劇集嘅幕後故事。

我帶兩位嘉賓,去到位於旺角嘅「鴻星中菜」,品嘗最當造嘅黃油蟹,暢談演出嘅點滴。

Kelvin同Kelly喺新劇《特技人》中,飾演螢幕情侶,雖然佢哋首次合作,但好快培養出默契。

 

網民盛讚

我係Kelvin嘅世叔伯,我同佢爸爸好有緣份,既係同行又係友好關係,所以佢一出道我都俾咗好多意見,睇住佢成長。o依家佢演出劇集,我當然要支持!

Kelvin表示:「我o依家都一步一步嘗試緊自己鍾意嘅嘢,唔只唱歌。對我嚟講,演戲係一個突破,始終我係歌手出身,慢慢都有機會嘗試做演員,尤其今次可以拍到《特技人》,我真係好開心,因為台前幕後識到好多好朋友,包括Kelly。」

Kelly被點名,立即回應:「好多觀眾都對Kelvin大開眼界,話佢演得好自然,除咗歌好聽,演戲都唔差。因為我o依家會通宵咗睇啲討論區,睇吓網民有咩留言,我係真係有睇o架,有好多人大讚。」

只要有觀眾俾意見,無論好定唔好,身為演員嘅都要接受,雖然無辦法please到全世界,只要令自己進步就得。而今次兩位嘅角色,對佢哋嚟講都係新鮮嘅,演起嚟就加倍用心。

Kelly表示:「我喺劇入面嘅角色叫秦臻,都係演員嚟嘅。角色同我係似似哋嘅,本身我都係一位演員,會有好多位相似,但有時愈似自己就愈難演,所以演呢個角色,最大挑戰就係要了解自己。」

Kelvin不忘大讚拍檔:「佢好厲害o架,你唔好睇佢弱質纖纖咁,打起上嚟都幾勁,佢有兩場戲真係要揸槍、又要boxing,所以都好傷o架。」

Kelly即刻接上:「我好鍾意你一句對白,係話我嘅:『吓?咁就叫識得郁o架啦?你之前癱o架?』啲對白你好精警!」

對白嘅功勞,Kelvin歸功整個團隊嘅高信任度:「可能係自由度好高,導演、監製都好信任我哋,互相信任所以演員之間可以去得好盡。」

我帶兩位嘉賓,去到位於旺角嘅「鴻星中菜」,品嘗最當造嘅黃油蟹,暢談演出新劇嘅點滴。

 

譚俊彥同朱晨麗為劇集另外一對男女主角,佢哋飾演特技人,係劇中動作場面嘅擔當人物。

 

我哋今次品嘗嘅「蟹聚宴」(優惠價$880/位;原價$978/位。每 2 位起及加一服務費),當中菜式包括清宮茄段帶子,以鮮甜爽口嘅帶子,與茄子一齊炒至爽身,加入帶微辣嘅豆瓣醬,為味蕾多添一份刺激。

 

花雕黄油蟹(半隻/位、前)及岩鹽焗紅蟳蟹(半隻/位、後)。黃油蟹以陳年花雕灌醉後再蒸,醇香甘味滲透至蟹肉及蟹膏,入口即溶。紅蟳蟹經岩鹽焗製後,提升蟹嘅香與鮮,惹味至極!

 

「裸跑」體驗

對白之外,佢哋喺拍攝過程中,都遇到難忘嘅事。Kelvin話:「可能成套戲都係由年輕人製作,劇種又比較輕鬆啲嘅,所以都有好多趣事。我最深刻應該真係裸跑嗰場戲,其實拍之前都緊張o架,要喺條街度除晒衫,只係着一條蝦肉色嘅三角褲周街跑⋯⋯

「但真係到action嘅時候,我都唔理嘞!嚟就嚟啦,除晒!嘩!原來好舒服,我好似鍾意咗裸跑,因為個感覺好free、好坦蕩蕩,直情係平時關楚耀唔可以做嘅嘢,拍劇就一次過全部呈現晒出嚟。所以自己睇翻《特技人》嘅時候,都好開心。」

Kelly就話:「因為我嘅角色都係演員,所以會有好多造型,或者劇情話我會拍好多廣告,短短哋幾場戲,但都會有話我同Kelvin係度扮泰國嘅情侶;又話我做『黑玫瑰』、一時又《少林足球》造型⋯⋯跟住我發現,原來光頭出嚟嘅效果係好自然、好真嘅,亦都真係有人問我,係咪真係剃咗頭,係啲網友講嘅,有人仲話我光頭都好靚,咁即係我真係幾靚o架喎,哈哈!」

將於年底繼續拍劇嘅Kelly,表示仲有好多角色想演,當中最想係嘗試做警察,除咗挑戰演技,佢仲想挑戰自己嘅體能。

 

Kelly喺劇中造型百變,令佢拍一套劇就試到多種感覺。

 

喺街上裸跑嘅情節,係Kelvin最難忘嘅一幕,佢決定豁出去演繹,得到嘅反應令佢喜出望外。

 

金銀豚肉,為上海肴肉與皮脆肉嫩嘅廣東炭燒肉,前者用豬腩肉及腿肉混入豬肉湯,熬製成膠質,冷凝後切成方塊狀,為製作需時嘅手工菜,兩者一冷一熱,令舌頭有雙重享受。

 

雞燉花膠,將花膠、老雞、火腿、肉粒等隔水燉三小時,令每種食材嘅精髓,匯聚於燉湯中,濃郁滋補。

 

招牌眼鏡

一聽到造型,Kelvin就表示:「我個角色嘅造型,其實係參照Paco嘅造型,即係長期都係戴住眼鏡,最初係監製同我傾,佢同我講:『嗱,阿關,我想你今次套劇嘅造型,係有好多太陽眼鏡嘅。』,我就問點解,因為個角色就算喺室內食飯,都要戴住太陽眼鏡,佢就話:『冇錯!就好似Paco咁樣!』

「佢真係咁講,因為Paco你嘅形象太深入民心,監製都想我個角色有呢個深入民心嘅感覺,同埋好藝術家,因為Paco俾人嘅感覺,都好藝術家、好自我。」

嘩!估唔到我對套劇都有少少幫忙,哈哈哈!

Kelly話:「有時可以忠於自己嘅style,我覺得呢種堅持,係值得欣賞嘅。」

除咗拍劇,Kelvin正積極開拓大中華市場,為咗有健康嘅體魄迎接挑戰,早前佢去咗泰國做咗啲療程,仲養成一個飲食習慣。「每餐正餐之前,我都會食啲蔬菜同生果先,係泰國啲營養師教我嘅,咁嘅飲食方法會健康好多,正餐啲油份俾啲蔬菜同生果吸收晒,排出嚟嘅時候,就全部清乾晒。」

 

大廚(中)嘅技術,令兩位嘉賓讚口不絕。

 

Kelvin話劇中嘅眼鏡look,係取材於我,哈哈!唔講我真係唔知,自己都幫到佢哋手。

 

元貝青蔬,味道較清淡,平衡之前嘅香濃美食。

 

蠔皇六頭鮑魚津膽,以老雞、上等金華火腿等熬出上湯,用作炆煮六頭鮑魚,使鮮味完全滲入鮑魚之中,配上日本花菇,風味絕佳。

 

荷香石頭魚飯,用上鴻星招牌石頭魚起肉切粒,與飯拌勻,加入薑絲、菇絲,以荷葉包裹並蒸香,啖啖荷香鮮味。

 

鴻星中菜
地址:旺角太子道西193號新世紀廣場6樓601A號舖
電話:26280890