王君馨吹水表情多
三十二歲嘅王君馨（Grace）雖然已為人妻，但係鬼妹仔性格，為人寧舍坦率爽直。
日前下晝四點幾，東姑就喺中環置地廣場一間酒店，撞到Grace相約一個女性朋友歎茶傾偈。見佢全程表情多多，一時笑容燦爛、一時擠眉弄眼，傾偈傾到極之投入肉緊，就算隔住塊玻璃，都feel到佢講嘢時嘅情緒起伏變化，真係毫無遮掩，真我個性盡表現。
難得佢嗰日仲係素顏冇化妝，後來發現咗東姑，都冇好大反應或者黑面，只係同朋友調位坐；佢身背向街外，傾偈時就可以再暢所欲言啲。最終，佢同朋友吹水吹到夠晒喉，先施施然一齊離開，似乎亦冇刻意避忌入鏡，大大方方照以素顏示人。
當日，素顏零化妝嘅Grace，同朋友喺酒店café飲下午茶，好傾到雞啄唔斷。
傾偈時表情多多嘅Grace，唔知講起乜，忽然擠眉弄眼，表現厭惡。
Grace同朋友吹水吹足兩個鐘，一齊由酒店離開，無懼以素顏面對鏡頭。
