宮闈劇《延禧攻略》，劇情緊湊，各路妃嬪，為爭上位，扭盡六壬，賤招盡出，寧舍吸睛。不過，東姑亦都有將焦點就放喺一班宮女度，佢哋同樣鬥到你死我活，不遜於一眾主子。大家唔好睇小呢班宮女，佢哋全部都係內地新晉嘅小花，最年輕只有十五歲，而年紀較大、三十二歲嘅施予斐，竟然曾勇闖過荷李活，兼做過女主角，楊冪都只係配角，你都咪話唔威！

爾晴─蘇青

蘇青飾演嘅爾晴係富察皇后最貼身嘅侍女，表面溫柔體貼、賢良淑德，但原來妒忌心超重，可算係一班宮女之中最可怕的一個。爾晴不但用盡方法，令傅恒同瓔珞無法有情人終成眷屬，跟手，自己嫁畀傅恒，但又要傅恒「戴綠帽」；最後，佢更間接令皇后自盡。

蘇青演大奸角，爐火純青，令網民都認為她是專業的反派，對佢恨之入骨，所以當佢被瓔珞狠狠掌咗一巴，以及最後被灌毒而死嘅一幕都大快人心。二十九歲嘅蘇青，曾經參與過唔少大劇，譬如喺《美人心計》中飾演單純、善良、無心計嘅張皇后；以及《傾城雪》中飾演命途淒苦，但唔屈服嘅勵志角色。螢幕前，蘇青一向都是斯文、討好，但爾晴呢奸角剛好相反，令佢經常失眠，到後期仲成個人完全投入到難以抽離。

爾晴係富察皇后最貼身嘅侍女，表面賢良淑德，但原來妒忌心超重。

蘇青話接咗爾晴呢個角色後經常失眠，到後期仲成個人完全畀個角色影響。

出水能跳，入水能游；就連水底運動都難唔到蘇青，佢仲攞到國際認證嘅自由潛證書。

明玉─姜梓新

姜梓新飾演富察皇后嘅貼身宮女明玉，起初常與瓔珞作對，性格直爽，有啲小脾氣，令觀眾有錯覺佢係壞人。不過，之後佢會畀純妃嘅銀針傷害，雖然太醫幫佢取出咗八針，但其實佢體內仲有幾支針，並快進入心肺，要死係遲早嘅事，所以御前侍衛海蘭察即刻向佢求婚；可惜，自知時日無多嘅明玉，竟然咬牙拒婚。之後，佢被安排嫁出宮，瓔珞又幫佢親自整嫁衣，表面幸福接近之際，佢竟然自殺，真係睇到人崩潰。

二十二歲嘅姜梓新，現實中打扮清新，令人一見難忘。之前，佢曾參加過《如懿傳》嘅試鏡，可惜落選；好彩之後，畀《延》劇嘅監製于正睇中，立即聯絡佢，並火速將佢收為己用。佢除咗鍾意做戲之餘，仲好喜歡唱歌，不時喺網絡自彈自唱，更參加過《超級女聲》添！

明玉性格直爽，有啲小脾氣，但對主子十分忠誠，後期更盡心扶持瓔珞。

姜梓新外形清新甜美，加上一雙「無辜眼」，笑起來又清純，故網友封佢做「初戀女神」。

芝蘭─施予斐

施予斐飾演高貴妃嘅貼身侍女芝蘭，佢對主子忠心耿耿，只要有人傷害高貴妃，佢絕對唔會留手地攻擊對方。

三十二歲嘅施予斐畢業於北京電影學院，擁有八分之一烏克蘭血統，五官深邃，十八歲已經孖住周杰倫拍手機廣告。入娛圈後，劇接劇不特止，更做埋女一，處女劇《雪域迷城》就同趙文卓合作；而拍《帝錦》時，又孖住韓星安七炫；在〇八年，更接拍荷李活鉅製《人魚帝國》。當時，佢就好自滿咁講：「機遇好重要，但更重要嘅係實力，我嘅美喺荷李活係眾人稱讚嘅，我嘅實力亦係有目共睹嘅。我喺荷李活嘅星途絕對比鞏俐、章子怡更加順暢，因為我嘅起點比佢哋都要高。」有傳，佢能夠拍《人》片，完因該片嘅執行導演係佢男朋友；可惜，佢後勁不繼，喺《延》劇只能做宮女。

高貴妃嘅心腹芝蘭，囂張跋扈，專幫主子陷害其他人，毒蠍心腸。

施予斐擁有八分之一嘅烏克蘭血統，五官標緻，所以一出道就成女主角。

〇八年，施予斐同楊冪一齊拍荷李活鉅製《人魚帝國》，施予斐擔正做女一，楊冪只係配角。

吉祥─張澤兮

張澤兮飾演嘅宮女吉祥，係瓔珞入宮後首個認識嘅人。吉祥初入紫禁城時，唔小心整污糟咗秀女烏雅氏件衫，烏雅竟惡到要吉祥用手嚟賠，瓔珞立刻出面化解危機。因瓔珞連救吉祥兩次，自此兩女互相扶持，共同渡難關；可惜，吉祥遭另一宮女玲瓏陷害，死於非命。

呢位飾演吉祥嘅可愛小妺妹叫張澤兮，現年十五歲，曾入讀北京舞蹈學院，佢o依家仲讀緊中學，一邊學習一邊拍戲，仲經常攞到獎學金，難能可貴。外貌甜美可人嘅張澤兮，被視為新一代嘅小花，獲《延》劇嘅監製于正力捧，前途無可限量。

由張澤兮飾演嘅吉祥，生日當日畀玲瓏插贓嫁禍，結果生日變死忌。

由張澤兮飾演嘅吉祥，生日當日畀玲瓏插贓嫁禍，結果生日變死忌。