為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 08 月 30 日

土地大辯論近尾聲 棕地、填海方案爭議最少

土地大辯論」公眾諮詢將於九月廿六號結束,土地供應專責小組擬於十月《施政報告》出爐前,整理諮詢收集到嘅資料,撰寫中期報告交畀政府,方便特首為土地政策落墨。

據悉,小組目前收集嘅意見顯示,十八個覓地選項中,以填海興建東大嶼都會及發展新界棕地嘅意見較聚焦,亦較少反對聲音;而發展粉嶺高爾夫球場嘅意見最分歧,支持同反對聲音都好極端,未有清晰嘅傾向性。

為配合特首撰寫《施政報告》嘅時間表,小組將喺九月十九日立法會聽證會後,開會研究寫中期報告,概括交代初步嘅諮詢結果。消息指,小組仲未完成所有問卷及電話調查,o依家未有最完整及全面嘅數據,相信中期報告難免流於皮毛。

土地小組主席黃遠輝都打晒開口牌,話:「中期報告係因應政府要求而提交,交嘅時候公眾諮詢仍未完結,所以唔會就十八個選項逐一說明民意傾向,只涵蓋部分選項嘅大方向和小組觀察。」

由於填海興建東大嶼都會及發展新界棕地嘅選項較少受訪者反對,相信中期報告好可能對呢兩個選項着墨較多;粉嶺高球場因為爭議性大,所以好可能唔喺中期報告度提。

消息指,中期報告出爐後,小組嘅工作仍會持續到年底,希望到時能交出一份最全面嘅「終期報告」。由於唔少團體、地區組織及政黨都關心到有關選項與本港人口政策嘅關連性,以及各選項嘅造價問題,但諮詢過程中小組無清晰交代;消息指小組爭取喺分析意見數據時,會補充相關資料,希望喺年底公布「終期報告」涵蓋相關內容。

但唔少團體都表示,對「終期報告」不抱厚望,批評使成千萬公帑搞嘅「大辯論」,大費周章咗幾個月,相信最終都係得出一啲「阿媽係女人」嘅結論。「鬼唔知發展棕地較少人反對,問題係政府點樣解決收集棕地業權嘅難題,民意之外,我哋最需要點樣落實嘅方法。」

為期五個月嘅土地供應公眾諮詢接近尾聲,據悉填海興建東大嶼都會及發展棕地嘅選項,較能凝聚共識,好可能寫入中期報告。

 

連場辯論出現唔少火爆場面,以發展粉嶺高球場嘅選項較多爭議,意見較兩極化。

 

發展棕地嘅建議相對地較少反對聲音,但土地小組無就回收棕地業權等難題,提供有建設性意見。