為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2018 年 08 月 28 日

關慧玲

《東周刊》社長兼總編輯。

坐高鐵去廣州食消夜

高鐵香港段下月通車,香港連接內地的一小時生活圈逐漸成形。從此,由西九去深圳只需要十四分鐘,去廣州就四十八分鐘到埗,周五放工後搭車去廣州食消夜,不是不可能的事。

由於要核實一點資料,上網看了一下,發現內地和香港輿論真是兩個不同的世界;內地對於高鐵站沿途停幾多個站、票價比較、各站之間連接交通安排等基本資訊都報道得比較詳細,相反香港這邊則停留在長途線跟飛機競爭力不足,西九站滲水等問題上。

筆者上周試搭,由西九直接坐到石崗車廠,在最有利位置沿路金睛火眼睇到實,之前有報道話西九站瀑布般漏水仲驚見鐘乳石,老實講今次真係見唔到,除地上偶見兩三灘小水漬外,九成路軌基本乾爽。港鐵車務總監劉天成話,鑽地挖洞、下大雨都有可能引起滲水,處理方法一係灌漿一係引流,而佢哋檢視過,目前情況正常,有信心正式開通時不受影響。

另外值得一提的是,筆者一行人經隱秘通道走入仍未開放的B1售票大堂試買飛,程序並不複雜,但緊記要出示回鄉證。入閘後一條路行去B3離境層辦理離境及入境內地手續,便可以在B4月台搭車。呢段路程要行幾分鐘,正式開通時加上人流和過關的等候時間,搭客最好時間上預得鬆動一點。不過如果有時間有心情,亦可以放慢一點腳步,參觀吓車站流線型的設計(圖1)和當中的藝術品,包括王無邪的畫作。

 

 

有人在候車大堂發現所有大柱上都三百六十度裝上了多部乍看是閉路電視般的儀器(圖2),嘩然說「咁大陣仗?」港鐵職員笑着解畫,話呢組其實係溫度監測器及滅火設備;上面白色的鏡頭會偵測燃燒產生不正常熱力,發出波長,啟動下方的噴水裝置滅火。大夥人即時大笑,話諗多咗。

 

 

高鐵香港段由起步到興建都相當惹火,一地兩檢又引起過唔少爭論;如今一刻人坐在列車上,親身感受它的快、定、靜,別有一番體會。香港人似乎愈來愈習慣甚麼都喧囂一番,事過境遷,沒有人記起當中細節,只是涉事的人,卻被潑了一身污水。