龔慈恩影相勁貪靚

五十四歲嘅龔慈恩，曾因為婚姻淡出幕前，直至近年先復出，逐漸活躍電視圈。雖然，佢飾演嘅都係一啲媽媽輩份嘅角色，但係唔少觀眾都讚佢保養得宜。

早前，東姑就喺九龍塘仔公園，巧遇佢為電視劇《牛下女高音》開工拍外景；期間，一個女工作人員，揸住手機幫佢影低劇中嘅造型，方便連戲。估唔到佢都有妹妹仔粉絲，幾個喺公園跑步做運動嘅後生女，追上前要求同佢「集郵」，佢當然冇say no大方任影啦！

後來，佢同工作人員行埋咗一二邊繼續影造型照。而東姑就見佢要求多多，一時坐、一時企，擺晒甫士，難為工作人員踎低、趷高、伸長手，攞個最佳角度影相，十足「私影」寫真咁款。睇嚟，龔慈恩都係一個貪靚之人，對美咁有要求，難怪keep得到又keep得好喇！

對影相似乎好有要求嘅龔慈恩，搵埋公園草地長櫈靚景擺晒pose影相。

難得五十四歲專演媽媽角色嘅佢，都有妹妹仔粉絲，佢當然無任歡迎，nice爆企定定同大家合照。

龔慈恩擺晒四十五度角嘅甫士，仲要求工作人員舉機「高抄」，影張造型照都絕對唔馬虎。