吳卓羲舊愛結婚chok唔起

吳卓羲（Ron）喺一一年被爆出同國產女星張馨予拍拖，而當年佢嘅社交網仲離奇出現咗張馨予嘅牀照。有傳，係女方私自入佢嘅戶口出post放相，以宣示主權，卒之兩人火速玩完。早前，張馨予就喺社交網公佈喜訊已為人妻，老公係內地反恐特工何捷。

日前，阿Ron同劉心悠（心悠BB）喺旺角女人街為電影《再見‧女人街》拍外景，佢喺傳媒面前，就大方祝福舊愛。不過，東姑發現佢嘅狀態，就似乎麻麻地，唔知係咪同「舊愛結婚了，新郎不是我」嘅消息有關呢？

東姑所見，同場嘅心悠BB飾演跟車送貨工人，以一身背心熱褲「羅拉」造型出現，非常之養眼。喺人頭湧湧嘅旺角街頭，個個都爭住影心悠BB相，而無厘心機chok極都chok唔起嘅阿Ron，當然係被比下去；最慘係平時啲妹妹仔粉絲，仲唔知去晒邊，搞到佢都一臉冇癮咁嘅款。雖然佢係男人之家，但做呢行靠面口搵食，見佢點都抖擻提起精神，仲姿姿整整搞呢搞路，一時滴吓眼藥水，消除疲勞增強電力，一時又對住車窗當鏡整理吓頭髮，似乎都好緊張儀容，盡chok喇！

跌晒watt嘅阿Ron冇乜人理，仲好似無厘精神咁，頻頻捽晒眼。

好快又要埋位拍攝，阿Ron惟有滴眼藥水急救雙眼，希望盡快回復到佢chok爆嘅迷人電力喇！

心悠BB以「羅拉」造型，扮演女跟車送貨工人，性感指數爆晒燈，難怪圍觀途人都淨係專注喺佢身上。

就算坐上貨車入面，畀塊玻璃隔住嘅心悠BB，一樣搶晒fo，啲粉絲舉晒手機猛影佢。

相反，平時有唔少妹妹仔粉絲，跟出跟入嘅阿Ron，竟然唔多受旺角大叔大媽嘅歡迎，搞到佢都冇晒癮！

姿姿整整嘅阿Ron，好貪靚咁對住車窗玻璃當鏡，照鏡梳頭。

張馨予喺社交網公佈已婚喜訊，而老公何捷仲係武警特戰軍官，銜頭夠晒威武。