雷莊兒損港姐形象

一七年港姐冠軍雷莊兒，家境富裕，老竇係香港十大設計師兼富商雷葆文，佢哋早年已經移民加拿大。據講，莊父喺中、港、加名下都有物業，所以有好多人話佢攞冠軍係因為家底厚。當時，雷莊兒就笑笑口咁話：「其實一出咗呢個news，我直接打去問爹哋，同佢講：『唔知道你係一個富爸爸喎。』」不過，新一屆港姐就快出爐，回顧雷莊兒嘅工作量，真係少之又少，所以佢同東姑講：「卸任後想返加拿大。」仲好感慨咁話：「嗰邊生活冇咁辛苦！」

身兼演員同模特嘅雷莊兒，身高一百七十厘米，身材算唔錯。日前，東姑喺銅鑼灣嘅街頭，就見到長髮飄逸嘅佢，着咗一套緊身嘅衫，凸顯咗佢嘅一副model身材。一路上，佢都好似行catwalk咁樣，好有儀態；可惜，東姑發現佢突然衝紅燈過馬路，唔守交通規則，有損港姐形象，即刻扣晒分囉！

身高一百七十厘米嘅雷莊兒，行街好似行catwalk咁，確實好搶眼。

對自己一雙腿好有自信嘅雷莊兒，着咗一條緊身長褲，完全表現出佢嘅線條。

身為一個未卸任嘅香港小姐，佢竟然唔守交通規則衝紅燈，扣晒分！