郭富城當街扮「難民」垃圾

天王郭富城（城城）自從結婚生女後，事業上繼續搏殺，工作未有清閒過，除咗準備佢今年一百場世界巡迴演唱會之外，又馬不停蹄密密拍戲，一年拍足四、五部電影，陪屋企人嘅時間自然少咗。不過，城嫂Moka都好識搵節目，自娛消磨時間，湊女之餘，閒時就相約朋友去逛吓街、歎下high tea，甚至坐遊艇出海玩，認真寫意！

早前，東姑就喺旺角街頭，巧遇城城為一部新戲拍外景；不過，佢開工就唔似老婆生活咁歎、咁舒服啦！見佢留咗鬍鬚，一身衫褲皺掹掹又邋邋遢遢咁，企喺街上面食煙扮滄桑，成個露宿者造型。後來，佢仲走埋旁邊嘅垃圾桶摷垃圾，喺垃圾袋入面最終執到兩隻波鞋。

咪睇呢場戲看似簡單，其實當日天王出巡，落區喺旺角拍戲，引嚟唔少途人圍觀，包括來自內地嘅自由行同胞，甚至南亞人士，場面極之墟冚。城城喺人羣眾目睽睽之下投入演戲，絕對係一大考驗，亦有勞工作大員在場維持秩序。難怪，一嗌cut機拍完場戲，城城即九秒九閃返上保母車，以免引起混亂喇！

喺新戲中飾演借宿快餐店做「麥難民」嘅城城，為造型留晒鬚，兼着到爛身爛勢。

挨喺旺角街頭嘅欄杆邊，城城發呆默默扯煙，扮到一臉落泊滄桑。

之後，城城走埋身邊嘅垃圾桶，猛咁摷垃圾。

城城同露宿嘅同伴一齊摷垃圾，仲畀佢哋搵到兩隻爛舊波鞋。

做咗人母嘅Moka，最多時間當然係湊女，仲激罕喺社交網，晒佢湊囡囡去郊外嘅背影照。

一身少女look、着到靚靚嘅Moka，同埋朋友坐上遊艇出海玩，天王嫂生活認真寫意。