為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 08 月 25 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

革新風暴

作為電影人,我梗係支持本地製作嘅電影,今個禮拜上映嘅《L風暴》,當然係我嘅選擇!作為反貪系列嘅第三部電影,今次有生力軍加入,為觀眾喺核心價值中,帶嚟新鮮感。

今次「Paco巨星飯堂」,我就請嚟三位新成員:影后Stephy(鄧麗欣)、實力派譚耀文,仲有真係生力軍嘅栢天男(Adam),去到位於天后嘅「小喇咩」,品嘗越法fusion菜,細說風暴背後嘅故事。

Adam、Stephy同阿譚(左至右)喺新片《L風暴》中合作,以演技、動作震撼觀眾感觀。

 

首度合作

根據過去嘅紀錄,林德祿導演炮製、關於反貪嘅「風暴」電影系列,都好受內地市場歡迎,而三位嘉賓都係首次同林導合作,一定有新衝擊。

Stephy話:「我第一次同林導演合作,佢好知道自己要啲乜嘢,每一場戲都記得去提醒我要有energy,要帶俾大家開心同色彩,因為成套戲得我一個女角,我聽得佢講最多就係呢句。你見到佢好斯文,講嘢又好陰聲細氣,但喺拍攝現場,佢係好有powero架!」

阿譚大表贊同:「講真,佢個樣都幾易恰,見到佢就會想恰佢囉。不過佢可以笑住去睇mon,就知道晒嗰場戲嘅所有問題,就算燈未打好佢都知,思路真係好清晰。」

演技愈嚟愈精進嘅Stephy,今次都作自我挑戰:「我今次飾演一個私影模特兒,接呢套戲之前,我都唔知咩叫私影,導演就解釋俾我知原來係俾人約出嚟,跟住喺私人地方俾人哋影相嘅。我嘅角色會令古天樂陷入一個險境,令佢俾人追查,成個故事就從我飾演呢個好率直嘅女仔開始。

「不過,我就好渴望可以同班型男戰鬥吓、槍戰吓,今次冇咁嘅機會嘞!我記得有場戲都好緊張嘅,古仔一路逃亡緊,我就喺馬路邊跳咗車,要係馬路度避車、搏鬥,嗰場戲對我嚟講都幾新o架!我好少接觸呢啲咁真實嘅危險動作,所以我覺得嗰場戲都幾特別、幾好玩。」

我帶三位嘉賓去到位於天后嘅「小喇咩」,品嘗越法fusion菜,細說風暴背後嘅故事。

 

電影系列有古天樂同張智霖「連戲」,更具叫座力。

 

Stephy首次同林導(左二)合作,即擦出火花。

 

黑松露巴馬火腿蜜瓜米紙卷($88),啱晒夏天醒胃。

 

青檸柚子雞翼($78),帶酸甜味嘅雞翼,出奇地開胃。

 

溫泉蛋芝士蟹肉大烤菇($78),入口感覺好rich。

 

奸得出色

阿譚出名係實力派,忠奸角都演繹得出神入化,今次佢就以較浮誇嘅方式演出。

「導演就信任我,揀我做反派啦,但佢話我前面演嘅奸角都未夠奸,係咁叫我今次要再奸啲!所以我今次就奸到出汁,我個角色係一個狂妄自大、口臭嘅人,加上佢又好鍾意控制場面,變相係天生大哥咁款。

「講到驚險場面,我諗係槍戰囉,嗰日就成條街都喺度駁火,我就對付Chilam,我都好耐冇開咁多槍嘞,所以今次就開餐飽。我記得嗰場戲係封晒街嚟拍,真係好難得喺香港有咁大火力,因為香港拍槍戰都有限制o架嘛。」

Adam作為一個新演員,今次有幸參與演出有咁多巨星嘅電影,先要佢介紹吓自己!

「我喺七年前喺澳洲返香港,嗰陣時都唔識講廣東話o架,o依家仲係catch up緊,香港人講嘢好快,澳洲人(語速)係比較slow啲,但係我會努力嘅。今次同咁多型男合作,我係有好大壓力。首先飾演一個有自閉症嘅角色,要同導演有好多溝通,佢俾咗好多guidance我,加埋好多前輩都俾咗好多comment我,所以後期就好好多。

「我同古天樂、譚哥最多對手戲,古仔真係俾咗好多advice我,當導演同武術指導同我講完,佢私下又會再同我講,佢知我廣東話唔叻,就問我:『你明唔明佢哋講咗咩?唔明我可以再講多次。』」

阿譚同Adam係新戲嘅大奸角,佢哋嘅表現,真係要拭目以待。

 

啱啱成家嘅鄭嘉穎,喺戲中都有精采演出。

 

自稱負責奸到出汁嘅阿譚,有重裝駁火演出。

 

黃金流沙龍蝦蟹肉薄餅($298),集滋味同鮮味於一身。

 

越式蒜片牛肉粒炒紅飯($188),惹味可口。

 

炭燒美國特級穀飼腹肉牛扒配薯條($298),夠晒juicy。

 

幸福姿態

今日其實我係好開心嘅,見到Stephy春風滿面,我已經有一種嫁女嘅心情,喺呢個時刻就梗係要問吓佢有咩招牌愛心菜式啦!點知佢話:「咪『生命之水』囉!係Paco你教我飲o架。」哈哈!

反而Adam就好講究。「因為呢一排我要keep瘦,油鹽醬醋好多都唔食,全部都係白灼。因為好多型男前輩都真係keep到好fit,所以我真係努力啲。o依家最多都係食蘋果,真係要食得好清,加上我係屬於飲水都肥嘅體質,所以真係要特別keep。」

阿譚就表示:「一睇就知我冇keep啦!我飲得食得瞓得,之不過係要飲中藥。因為成日捱夜要調理一下,我又係天生燥底,飲吓中藥好啲。」

愛情事業兩得意,Stephy更見容光煥發。

 

見到Stephy名花有主,我深感安慰。

 

今次嘅故事由Stephy角色出發,佢同古仔有唔少「鬥戲」場面。

 

日式綠茶拿破崙($78),層次豐富。

 

越式烤活魚($198),鮮甜美味。

 

小喇咩
地址:天后炮台山木星街18號地下F-G號舖
電話:25100123