高鐵通車泛民贈興　政府見招拆招

高鐵香港段，最快九月二十三日通車，各部門嘅準備工作進入尾聲。泛民嘅「贈興」工程亦接踵而來，先爆高鐵部分車站及路段漏水，繼指西九龍站曾使用唔合格螺絲頭，令一向在暑假期間相對平靜的政壇熱辣辣。

政府及港鐵急急接招，上周爆出漏水疑雲當日，港鐵即時邀請傳媒參觀，車站、月台、路軌槽等未見有大面積積水情況。同時傳媒獲安排試搭一段路程，列車最高時速約二百公里，放喺餐枱上嘅水，全程無太大搖晃；手機分貝應用程式都顯示，噪音介乎六十至八十分貝之間，凸顯高鐵穩、靜嘅特性。

據悉，政府及港鐵內部已提高警覺，一於兵來將擋當有負面消息出街，當局會馬上回應，提高透明度，唔畀機會有心人捕風捉影，除咗上周嘅傳媒試搭，九月一、二號特意舉行開放日，畀公眾睇真啲。

高鐵擬最快九月廿三日通連，當局嚴陣以待泛民趁機搞亂檔。

至於螺絲頭嘅問題，屋宇署亦即時解釋，雖然有部分樣本未能通過測試，但其餘批次嘅螺絲仍可以繼續用，都唔影響結構安全。消息指，政府全面驗收高鐵，證實一切妥當，o岩o岩先發出safe and sound（安全及可靠）批示，對行車安全性好有信心。也因為如此，呢兩波高鐵「醜聞」唔太炒得起。有指泛民手上仲有一個炸彈會掟出來，不過有關方面已做好接招準備。

「沙中綫爆到咁大鑊，其中一個原因係舞唔掂外資嘅承建商，但高鐵主要承建商係本地公司金門，該公司紮根本港，仲想繼續同政府做生意，唔會亂嚟。」金門之前已經就工程細節發表公開聲明，透明度高好多。

另外，高鐵由於早年爆發超支風波，政府已即時介入加強管理，並邀請土木工程署前署長、有「香港橋王」之稱嘅劉正光擔任高鐵工程顧問，專責檢視工程進度，有佢坐鎮嘅高鐵工程已將甩轆風險減到最低。

消息人士指出，當局依家怕只怕被「有心人」借題發揮，「相信高鐵通車前有人會繼續搞小動作，即使開通後，高鐵營運問題仍會繼續被人啄住，政府仲有排煩。」

公民黨連番爆高鐵嘅工程醜聞，包括部分車站及路段漏水，以及曾使用唔合格螺絲頭，但暫時殺傷力未見猛。

有「香港橋王」之稱嘅劉正光擔任高鐵工程顧問，專責檢視工程進度，希望將甩轆風險減到最低。