為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2018 年 08 月 21 日

關慧玲

《東周刊》社長兼總編輯。

陳啟宗訪美兩大印象

政治一日都嫌長,何況是一年?香港明天更好基金執委主席陳啟宗(下圖中)年年都帶多名執委委員訪美,說起美國人對佢哋總統特朗普的印象,跟往年相比,完全是今日打倒昨日的我。據他們形容,好多人由去年批評特朗普係狂人,唔知做唔做得完個總統任期,到今年異口同聲大讚他,態度可以說是一百八十度大變。

 

 

明天更好基金訪美接觸的都是政商界精英,他們的看法有一定參考性。

一年前,可能仍有人覺得特朗普唔會連任,但o依家睇基本上可以話無乜人係佢對手,連任機會都幾高。有美國人甚至認為特朗普已成勢頭,開創美國以至全球的新時代。

特朗普以狂、潑、講嘢唔算數聞名,私生活亦多受非議,但偏偏美國人話比起以往咁多個總統,佢最落力履行競選承諾,最「做到嘢」。提起中美貿易戰,外人可能理所當然以為美國商界會向總統施壓反對,查實商界覺得以往從沒有一位美國總統好似特朗普,喺貿易問題上赤裸裸為美國企業發聲,尤其佢成功大力減稅後,商界更對他改觀。從佢嘅民望正在上升,可以引證此言不虛。所以話在這個民粹澎湃的世代,遊戲規則真係變咗。

今次訪問另一個感覺,係美國人對中國的態度。在特朗普大力宣傳下,中國不能讚,罵中國才是王道,把中國當成敵人和對手而非友好,幾乎係美國朝野的共識,無論共和黨或民主黨,都係槍口一致對外。從前比較傾向中國的友好,就算無變臉都唔再出聲。

陳啟宗就話,美國不少選民是愚蠢的,會被政客花言巧語蒙蔽,敵對中國就是令美國人重新以美國為榮,所以得到支持。

對於貿易戰,佢話誰是贏家仍是未知數,但好大機會兩敗俱傷。佢講笑比喻話自己身材矮細,同拳王打一定唔夠打,美國就係嗰個七呎兩吋高嘅巨人,中國以前係矮仔,但o依家已經長成有七呎高,今時今日兩個打起嚟,就算美國人打贏都肯定要捱中國幾拳。

陳啟宗覺得貿易戰在美國中期選舉後未必會終止,因為兩年後就是總統大選。但佢睇得比較另類,話中國長遠而言會係貿易戰贏家,因為好多嘢都係逼到埋身一定要自己做。例如當年美國把中國拒諸太空發展計劃門外,中國於是自行研發,○三年便成功把載人火箭射上太空。今日美國不想高科技產品輸往中國,橫加封殺,中國就自行發展超級電腦,現在天河系統已係最廣泛被應用嘅超級計算機。

大國之間的關係波譎雲詭,可能明年基金會再訪美時,又是另一番景象。