為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 08 月 25 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

大馬的舊與新

八月底我將會「出團」到馬來西亞。唔好話我成日去旅遊,一間航空公司今年初做調查,發現港人二○一七年每人平均離港外遊三次,而一間信用卡機構發表嘅報告,亦指港人熱衷外遊,在亞太區排名第二。

去旅行有好多唔同目的,而我就鍾意悠閒睇吓景兼訪尋地道美食,不過今次大馬遊就加多一項行程,係港人至愛嘅睇樓活動,揀咗吉隆坡一個由老友梁志天設計嘅地標樓盤參觀吓。講開大馬樓,近年逐漸受港人追捧,舊年我參觀過一個位於檳城嘅項目,都賣得唔錯。

港人投資大馬樓除咗追落後之外,仲憧憬當地嘅經濟發展,雖然大馬政府五月時叫停隆(吉隆坡)新(新加坡)高鐵計劃,令大家嘅預期有落差,但政府推動「大吉隆坡」以及伊斯蘭金融中心發展,加埋之前喺呢個欄介紹過嘅「第二家園」置業居留計劃,都有助帶動當地樓市發展。吉隆坡政府更加喺舊年十一月宣布暫停審批一百萬馬幣以上(約二百萬港元) 嘅豪宅興建申請,睇嚟政府意識到市內土地會愈來愈值錢。呢個政策限制咗供應,樓價和租金相信會拾級而上。事實上,大馬樓價升幅唔及香港,但平均每年都升約百分之六。

吉隆坡代表大馬嘅新發展,而去檳城同怡保就係尋找舊情懷、原味道。大馬飲食文化融合中國、印度和原住民特色,每道菜都有自己嘅故事同歷史。好似峇峇和娘惹食品,就融合華人和馬來美食精華。所以落機第一餐就品嘗娘惹菜亞參叻沙,湯底用馬鮫魚熬煮再加入亞參同其他香料,酸辣鮮甜,複雜而精采。

我同尊賞假期商量加入乜嘢美食,旅行社極力推介兩條魚!其中一種係河魚王「忘不了」,來自大馬、印尼、越南和緬甸等地,其中大馬野生忘不了最受追捧,一公斤要成千幾二千港紙。點解咁貴?原來佢生長於水流湍急嘅河流,游得快好難捉,而且只有原住民先有權捕撈。呢種魚食風車果果實長大,聽聞魚肉帶有果香,到時真係要試試。食完河魚王仲有三公斤重野生巨型筍殼魚,清蒸以保留鮮美細嫩嘅肉質。雖然香港都有得食,但多數係養殖,名字一樣,味道不一樣。

其他仲有用怡保山泉水種嘅芽菜、芽菜雞、麵包雞、鹽焗雞、肉骨茶、咖哩魚頭等等,我見張單張印到好似酒樓點心紙咁密密麻麻,真係要出發前減定磅先。

汲收上次經驗,旅行社特別插入「輕食」,等團友可以一次過淺試鴨肉粿條湯、福建炒麵、印度煎餅,仲有我哋潮州人名物炒貴刁。上次去越南飲咖啡,今次遊大馬唔少得一杯拉茶,到時可以睇吓師傅點樣以嫻熟技巧拉出一杯南洋風味奶茶。唔夠喉第日仲會去試埋由怡保一位師傅自創,用三種咖啡豆混合而成嘅白咖啡,配埋咖央多士,就係南洋下午茶。

講咗咁耐都未講到景點?我返來至同大家分享啦,不過我見到行程上有個地方叫「二奶巷」,真係想去見識吓!

港人投資大馬樓除咗追落後,仲憧憬當地嘅經濟發展,吉隆坡代表新發展,而去檳城同怡保就係尋找舊情懷。