當我想起你
已離開嘅故友，並非真正離開，而係會活於我哋嘅心中，永遠不老。嚟緊嘅9月7日，係我嘅伯樂、戰友Danny陳百強嘅六十歲冥壽，即使佢已離開近廿五載，我都會不時想起佢。
林姍姍同資深傳媒人倪秉郎，都係Danny生前嘅好友，喺呢個特別嘅日子，我帶兩位去到位於灣仔嘅「Palco Ristorante」，品嘗特色嘅法國菜，細說與Danny嘅點滴。
今年係Danny嘅「六十大壽」，除咗有我同姍姍、郎少細說當年，環球唱片仲集合唔同世代嘅歌手，重新演繹Danny嘅名曲，集結成大碟《環球高歌陳百強》。
錄音小秘密
喺我哋嘅眼中，Danny係好獨特嘅，即使係好簡單嘅一個唱片封面，一個水池做背景，佢戴住Ray-Ban太陽眼鏡、着住背心，嘩！已經型到爆！
姍姍大表贊同：「係o架！佢有好幾個封面都好厲害，即係着唐裝衫、黑白色。佢有佢嘅諗法，無端端諗到一個封面出嚟。由美感至對音樂嘅敏感度，成件事都係好有畫面o架。」
郎少就話：「我諗Danny特別嘅地方，好似氣質，好難搵到相似嘅人。我哋o依家多數見到嘅，都係普通人、普通歌星，佢哋好貼地，但就冇咗嗰種優雅，甚至少少尊貴嘅感覺。
「睇吓Danny揀衫、揀顏色，就發現佢鍾意一種好特別嘅紫色，係一種混咗淺紅色加淺藍色嘅紫，真係唔係咁多人可以carry到。」
身為粉絲，姍姍贊成以外，都不忘「炫耀」：「我就好幸運，有Paco代陳百強送咗〈戀愛預告〉俾我，亦都幸運地因而同Danny變得熟絡。我好記得佢把聲好溫柔，我好鍾意同佢講電話o架。
「我記得錄呢首歌嗰時，Paco同Danny都同我講，要點樣imagine首歌點唱。佢好似有同我講過，最好要諗一個目標，要諗一個自己鍾意嘅環境。佢又話諗個顏色都得，鍾意瞇埋眼就瞇埋眼唱。我問過佢錄歌嗰時有冇瞇埋眼，同可唔可以去睇佢錄音，但佢拒絕我囉。」
Danny鍾意熄燈咁錄音，話咁樣至有mood。講錄音就令我諗起八三年嘅〈脈搏奔流〉 ，嗰時我都未飲酒，我最記得喺尖沙咀錄音，但個feel佢一路都入唔到，因為隻歌係好emotiono架嘛，咁一路都錄唔到，跟住佢話：「Paco，幫我落去買支白蘭地。」我嗰時仲心諗，做咩無端端買支白蘭地，又唔識買咩白蘭地，咁就買咗細支裝，好彩樓下就有得賣。飲完之後，佢即刻感情豐富又澎湃，湧晒出嚟，真係脈搏奔流！
我帶兩位嘉賓，去到位於灣仔嘅「Palco Ristorante」，品嘗特色嘅法國菜，一齊細說與Danny嘅點滴。
我所講嘅唱片封面，就係《百強84》，構圖同主角一樣完美。
吞拿魚他他魚子醬牛油果墨魚汁脆片（$188），層次感豐富。
岩手縣彩虹元貝配酸甜沙冰（$208），啱晒炎炎夏日降溫之用。
天生極敏感
郎少繼續回味：「我哋話Danny鍾意個mood、感覺，感覺一到，佢就會『出到嚟』。」
姍姍問：「咁佢係咪算係好敏感嘅歌手？我覺得佢特別sensitive。」
喺同我合作嘅過程中，有一次係我永遠都好難忘，嗰時錄緊《偏偏喜歡你》隻碟嘅其中一首歌〈盼望的緣份〉。嗰時我真係好俾心機去做mixing，點知一晚凌晨三點幾四點，Danny打去我屋企喎，我瞓到矇矇矓矓，聽到佢話：「你耳仔係咪有問題？」
我聽到之後，直情醒咗問佢咩事，佢就話首歌個speed直情慢晒！我就話冇可能啦，完全抓晒頭。我估嗰時佢飲咗酒，興奮得滯聽嘢就慢咗，咁我梗係第二朝即刻返去聽，話晒都係我嘅代表作之一，係冇可能慢咗o架！
姍姍即刻回應：「我都要同你講個後話，Danny都有同我講呢件事。嗰時黑膠碟出咗，佢問我會播邊首歌，我就話我首首都播，佢特登叫我聽〈盼望的緣份〉，又問我有冇覺得慢咗。
「我同Paco一樣好疑惑，因為我唔覺得有慢到，Danny就話：『有機會我會拎出嚟再mix過、再錄過，唔會係咁嘅speedo架！』我覺得係因為佢嘅敏感度好高，一件事佢frame咗係咁就係咁，唔會改變嘅，佢就係有咁樣堅持嘅美麗畫面囉。」
郎少有另一個故事分享：「我有一次去飲完嘢之後，去咗Danny屋企繼續飲，我去咗toilet，一擰轉面就見到洗手間門嘅背面，有一張好大嘅豹海報。豹係好高傲嘅動物，外表好靚嘅、身形好特別，而且好敏感，又走得快，嗰種感覺令我覺得Danny嘅生命，好活好sensitive，佢好關注周圍環境發生嘅事，亦好注重感覺。」
姍姍以Danny粉絲自居，時至今日依然記得偶像嘅喜好，而且一講起就再變身少女，相當專一。
雖然Danny為姍姍作曲同二人合唱，係我一手促成，但係以我認識嘅Danny，佢一定係欣賞姍姍，先會為佢作曲，亦因而成就咗佢哋嘅友誼。
有機西洋菜濃湯伴扇貝薄片（$158），濃湯以有機西洋菜鮮打而成，令人回味。
燒貴妃蚌伴陳醋松子仁汁（$138），汁醬更能帶出貴妃蚌嘅鮮美。
西洋化口味
味覺係另一種感覺，食嘢我唔特別推介，今次舊友相聚，就講Danny嘅口味啦，我記得佢鍾意飲香檳，同埋食西餐。
姍姍話：「我冇記錯佢鍾意食海鮮？（Paco：「係，西餐。」）佢好鍾意歐洲、西化、英倫。」
郎少即接上：「又會飛咗外國去睇服裝展。」姍姍又表示：「冇錯呀！跟住佢又話俾我知，冬天唔一定着冬天衫，夏天一定要着夏天衫咩？佢教我話：『件衫靚，可以喺舞台度表演出嚟咁咪得囉，啲觀眾咁遠，唔通會走過嚟，摸你件衫係咩質地咩？靚吖嘛，你係要俾到美感人哋睇o架嘛。買衫保暖就要講質地，但係舞台表演，就要講個美感。』到o依家我都仲記得。」
啱呀！喺舞台上，Danny係王者！姍姍再補充：「我係好fans心態，即係偶像鍾意啲咩，我就會跟住鍾意啲咩。例如Danny鍾意粉紅色，我鍾意粉紫色，都會話我鍾意粉紅色；知佢鍾意食海鮮，嗰時好似係龍蝦，咁我都話要食，但我嗰時其實唔知道龍蝦係咩嚟o架，哈哈！
「我嗰時同Paco一樣，對酒係零知識，可能係近呢十年八年先認識，但可惜嘅係，當我認識嘅時候，佢已經唔係我身邊。有時我喺度諗，點解我咁幸運地有Paco、有華納唱片公司嘅隊伍、又有兩首同陳百強一齊合唱嘅hit歌。因為有時喺街度，有啲同我差唔多歲數嘅人都會走嚟同我講：『我細個都會唱你嘅〈再見Puppy Love〉o架！』我覺得好榮幸，可能係同Danny有啲宿世嘅前緣，希望今世可以儲到啲緣份到下一世啦！」
因為音樂，令昔日任職港台高層嘅郎少，同danny成為好友。
紀念碟之外，9月9號仲會舉行《環球高歌陳百強演唱會》，關淑怡、劉美君同盧冠廷（左一、二及右一）都有份參與演唱。門票喺「The Club」以積分換領，CSL Mobile市場營銷總裁暨The Club行政總裁林國誠（右二）於記者會當日，都有現身支持。
澳洲羊架（$338），外香脆內juicy。
燒法國生蠔海膽西西里海水意粉（$498），以經處理嘅西西里海水炮製，係真正嘅海洋鮮味。
Palco Ristorante
地址：灣仔盧押道23號The Phoenix 2樓
電話：26188383、68932926
