為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 08 月 18 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

雅居樂由房地產到雅生活

提起雅居樂(3383),大家嘅印象可能係九十年代港人用幾萬(人民幣,下同)至十幾萬到廣東省買樓,實現業主夢兼得閒北上度假。

事實上,雅居樂一九九二年創立,喺中山三鄉起家,經過多年發展,不但起住宅樓,仲成功將呢個鄉鎮改造成現代化小康社區。內地二○一七年GDP排名廣東省全國第一,而中山就喺省內排行第五,當中房地產貢獻不小。同時間,雅居樂亦已經喺全國六十多個城市地區,發展咗逾百項物業,而且一直以建設優質社區和美好生活為目標。

土儲方面,配合大灣區發展,公司今年年頭喺佛山、江門投得新地皮,最近又喺廣東、四川、河南、安徽等省投地,補充土儲以備發展。由於多個項目推售成績理想,今年首七個月公司連同合營及聯營公司累積預售金額達五百四十一點七億元,按年升兩成,預售建築面積有四百二十一點二萬平方米,平均預售價每平方米一萬二千八百多元。

我自己就喺今年三月到海南島參觀過雅居樂海南清水灣。呢個集合別墅、公寓、酒店、高球場、遊艇會嘅項目,總建築面積達一千萬平方米,其中畀我最深印象嘅係泰國設計特色度假別墅。而最大賣點當然係十二公里長嘅清水灣沙灘。當日我哋坐車沿項目行,開咗半個鐘都仲未到「街尾」,真係無誇張。為咗貫徹美好生活理念,公司不單自己起公路,連水廠都自行建設,供應熱帶雨林泉水畀社區。

之前喺一個頒獎禮上碰見雅居樂投資者關係及企業事務高級經理陳銘韜(Samson),據佢講海南島樓盤唔少係本身住開雅居樂嘅業主買入嘅,其中有人用嚟做度假屋,亦有唔少年輕夫婦買一間畀父母仔女住,自己就返城市工作。讀書問題點解決?Samson介紹生活圈裏面有雙語學校同國際幼兒園。其實唔單止喺海南,雅居樂因應各地住客需求,目前已喺四十多個城市營運一百八十多所教學設施,由學前到高等教育,以至國際學校都有。

公司今年二月分拆物業管理業務雅居樂雅生活服務(3319)上市。我喺海南參觀時,都見識到一啲好貼心嘅物管服務,例如私人管家幫住戶買餸之餘仲可以幫忙切好送上門,住戶返到屋企炒炒就開得飯。另外除咗洗衣乾衣服務,物管亦提供高級手袋皮鞋保養和維修服務,適合高端豪宅住客。

雅生活上星期公布中期業績,今年首六個月營業額升百分之一百零三,毛利增百分之一百三十一,股東應佔利潤更升百分之一百九十六。增長主要來自物管收入升三成七,非業主增值服務收入升百分之四百三十七,業主增值服務收入增百分之一百一十一。公司現時管理總建築面積一億零九百萬平方米,分布二十七個省市自治區,公司更引述中國指數研究院預測,到二零二零年內地物管規模可達二百四十三億平方米,物管市場仍有大量增長空間。

 

陸叔到海南島參觀雅居樂海南清水灣項目。