陳美琪唔識搭港鐵

現年六十歲嘅陳美琪，〇一年同美籍華人忻尚永再婚，〇八年收養女兒Lucia。近年，佢大部份時間專心照顧家庭，間中接拍內地劇集，已經好少喺香港露面。難得，早前無綫翻播幾輯《刑事偵緝檔案》，令大家可以重溫吓佢嘅演出。

日前，東姑就喺中環港鐵站巧遇戴住反光烏蠅太陽眼鏡嘅佢，星味十足，行色匆匆跟住一個年輕女仔，趕去搭港鐵。不過，見佢似乎就唔多熟路，邊行邊由個女仔，手指指教佢行去閘口方向，相信因為做慣闊太少奶，平時多用私家車出入，所以唔多熟識點搭港鐵。好在後來入閘，東姑見佢都識得用八達通「嘟」，否則，就堅「離地」，反而似大鄉里出城喇！

〇一年，陳美琪同美籍華人忻尚永再婚，〇八年收養咗女兒Lucia，一家三口樂也融融。

一臉慌失失嘅陳美琪（左），好似唔係好熟路，要由身邊同行嘅後生女，手指指教佢行去閘口。

到咗入閘機，佢先匆忙喺手袋拿出張八達通卡出嚟。

戴住反光太陽眼鏡嘅陳美琪，星味十足，好在仲識「嘟」八達通，未至於太「離地」。