為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2018 年 08 月 13 日

王浩信與張振朗玩「He」情

貴為今屆無綫「視帝」嘅王浩信(Vincent),雖然已婚兼有唔少緋聞,但係所演嘅劇集角色,「暖男」形象深入民心,難怪擁有一班忠實粉絲。

早前,一個無綫大型活動之後,東姑就喺電視城外,見到大班粉絲守候偶像。其中,以Vincent班粉絲最有隊形,全部着晒棒球款嘅fan club制服,仲個個都「07」號碼,原來別具意義,皆因Vincent係七月七日生日,「7」就係代表Vincent喇!

咁啱嗰日亦有一班粉絲為張振朗補祝生日,佢同Vincent拍《踩過界》,劇中係出生入死嘅好兄弟,兩班粉絲於是拉攏兩大偶像,一齊捧蛋糕合照。大家盛情難卻,東姑眼見佢哋好合作,喺粉絲面前扮情深款款,張振朗仲只差幾厘米就錫埋落Vincent嘅面珠度。就喺呢個緊張關頭,連佢哋自己都覺得「HeHe」得過咗份,忍唔住爆笑。睇嚟o依家做人偶像,真係搵食艱難,對住米飯班主,都盡可能滿足佢哋嘅需求,仲要搞埋「基」情嚟娛樂大家添!

被兩幫粉絲拉攏埋一齊捧蛋糕影合照嘅 Vincent與張振朗,扮兄弟情深仲差少少咀埋面珠。

 

連佢哋都自覺舉動太過「HeHe」,張振朗忍唔住眼都凸埋,而Vincent就尷尬爆笑。

 

除咗為滿足粉絲嘅要求,睇落佢哋都好難兄難弟,老友鬼鬼終於正經影番張合照。

 

一班忠實粉絲有晒隊形,全部着晒一式一樣嘅棒球服,仲印上「07」號碼,代表七月七日生日嘅Vincent。

 

對於米飯班主嘅要求,Vincent一律來者不拒,同粉絲摸黑都要打燈影相。