為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 08 月 09 日

容海恩「閃婚」 新郎係孫中山親信後人

四十一歲,有「法律界桂綸鎂」之稱嘅立法會議員容海恩,與新民黨政策總裁袁彌昌爆出「閃婚」喜訊,更有傳佢哋係奉子成婚。問番準新娘容海恩,佢以「唔答私人嘢」為由拒絕正面回應傳聞。但本刊獲多方消息指,佢哋真係雙喜臨門,擬下周五喺尖沙咀一間酒店搞婚禮。

今次抱得美人歸嘅袁彌昌,好多人都知佢係人民力量前主席袁彌明嘅阿哥,但鮮為人知佢哋係革命分子袁希洛嘅後人,袁希洛一九○六年參加同盟會,係孫中山嘅親信之一。之後袁家移居香港,家族經營相機器材生意,仲開埋工廠生產電子產品。

年約四十歲嘅袁彌昌家底唔錯,查冊發現佢○一、○二年,二十出頭就買磚頭,以個人名義分別喺中半山及跑馬地禮頓山買咗兩個豪宅單位,二至四年後分別以一千一百幾萬及二千六百幾萬沽出,轉手共賺一千七百萬。一五年,以六百幾萬喺將軍澳日出康城買咗個單位,持有至今。

有錢有樓當然係「筍盤」,袁彌昌仲係優才生,畢業於名校聖士提反書院,之後攞埋香港大學社會科學學士、倫敦政治經濟學院碩士,以及英國雷丁大學戰略研究博士學位,o依家除咗係新民黨政策總裁,仲身兼中大全球政經碩士課程客席講師及中央政策組特邀顧問。

另外,如果容海恩真係有B就創咗立法會兩大紀錄,會係第一位喺任內結婚,以及生仔嘅女議員。事件都引發唔少人關注議員病假、婚假、產假等係點安排?立法會秘書處回應,「立法會議員的酬金及津貼制度,並沒有包括分娩假期或侍產假的安排。」

消息人士解釋,原來議員係無產假制度,甚至連病假都無制度去申請,「議員唔係僱員,返唔返辦事處,出唔出席會議由佢自己決定,但如果無向主席請假就當無故缺席會議,情況持續超過三個月,可能面對不信任動議,隨時喪失議席。」

容海恩近日露面未有見肚迹象,但如果真係雙喜臨門就會打破立法會兩大紀錄。

 

袁彌昌(左)係孫中山親信袁希洛(小圖)嘅後人,而且家底厚,又有學歷係筍盤之選。

 

袁彌昌二十出頭時,已經成為跑馬地禮頓山嘅業主。