為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 08 月 12 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

閨蜜以上

相處七年,未必一定有「七年之癢」,好似由趙慧珊(Aka)、李靜儀 (Heidi)、吳嘉熙(Cheronna)、蔡明思(Jessica)同陳穎欣(Yanny)組成嘅五人唱跳女子組合Super Girls,由相識到成軍,至今已經七年,佢哋既係並肩嘅戰友,亦係談心嘅閨蜜,感情並非能以筆墨去形容。

今次「Paco巨星飯堂」,我就帶Super Girls去到位於西環嘅「膳亭」,品嘗特色嘅潮州菜,細說佢哋比閨蜜還要親厚嘅感情。

雖然Super Girls四缺一,但Aka、Heidi、Jessica同Yanny(左至右),喺訪問期間不時提起缺席嘅Cheronna,可見五人一心,勝過閨蜜。

 

出紀念曲

Super Girls推出咗新歌〈閨蜜專用〉,大講女生間的閨蜜情,作為七年嘅里程碑。隊長Aka表示:「新歌除咗着重講閨蜜情,亦係想紀念我哋相識七年、成軍六年嘅感情。」

Jessica就話:「當中包括咗我哋相處嘅點滴,開心同唔開心時會做嘅嘢、互相支持對方,仲有我哋同甘共苦、一齊追夢嘅回憶。」

Yanny感慨咁話:「希望我哋可以一直落去,永不拆夥。」

為咗新歌嘅MV,佢哋要喺冇冷氣嘅情況下,跳足十二個鐘嘅舞。Heidi大爆:「因為嗰時適逢係四年一度嘅世界盃,有成員趁住拍MV嘅空閒,睇世界盃直播。其實我哋跳舞跳咗超過十二個鐘,啲窗又閂晒,但拍嗰陣仲要熄埋冷氣,搞到我哋好似焗桑拿咁,好彩最後出到嚟嘅效果好好,我哋咁辛苦都係值得嘅。」

我帶Super Girls去到位於西環嘅「膳亭」,品嘗特色嘅潮州菜,細說佢哋比閨蜜還要親厚嘅感情。

 

Super Girls以新曲紀念相識七年,特別有意思。

 

 

 

鵝肝伴鵝片 ($130/份),潮州大鵝粉肝,可媲美法國鵝肝;鵝片就方便喜歡啖啖肉嘅食客。

 

潮州凍食馬友魚($148),馬友魚油份較豐富,肉質較嫩滑,魚味又較好,採用潮州凍魚嘅手法烹制,再配以經過調較嘅普寧黃豆醬,更能凸顯鮮味。

 

椒鹽魚蛋($58),潮州嘅手打魚蛋以爽滑見稱,配上椒鹽嘅烹調方法,外脆內嫩,實為佐酒及餐前小食一大佳品。

 

珍貴感情

隊長Aka強調:「新歌是慶祝組合出道六年且相識七年而誕生的作品,用閨蜜情為主軸,係因為女仔對閨蜜情最有共鳴。我覺得歌詞中『一班姊妹一間星級酒店房,可以不化妝傻笑對望』好真實,因為我哋一齊出trip拍廣告,但出trip又得一個鐘頭瞓,咁大家落咗妝,狀態最差嘅時刻,就成日比對方見到;有啲成員又鍾意剝晒衫肉帛相見,所以呢句歌詞,可以說明我哋可以坦蕩蕩相處囉。」

出道多年,披荊斬棘走到o依家,實在得來不易,其中最珍貴嘅,無疑是彼此嘅友誼。Jessica補充:「首歌仲會講一班女仔開心時一齊去玩同去旅行,又或者一齊望男仔;唔開心嘅時候,開個Party就冇事,大家都係做最真實嘅自己,了解晒大家嘅一切,所以好少觸碰到對方嘅底線。我覺得閨蜜就係咁,有事發生時都會陪伴左右,知道大家都會喺度嘅。」

隊長Aka(右)經常俾成員整蠱,連Yanny(左)都怕隊長會嬲豬。

 

飯敍當日抱恙嘅Cheronna,除推出個人單曲,仲有份參與演出ViuTV劇集《Plan B》。

 

菊花石榴雞($60)為潮州名菜之一,賣相吸引。透薄嘅蛋皮包住雞肉、冬菇粒、馬蹄粒、雲腿粒等材料,係一道手工菜。

 

香煎蠔仔烙($88),喺鴨蛋、薯粉漿內加入魚露,堅持不用油炸,以慢火烹煎,香脆惹味,又保留珍珠蠔嘅鮮味。

 

碧綠川椒牛肉($78),川椒粒磨成粉、配合葱末作佐料,珍珠菜葉係幾乎只有潮州菜系先使用嘅材料,經油炸後夠脆夠綠外,更有獨特味道,配上嫰滑牛肉,更見特色。

 

大方隊長

成員一致認為,彼此嘅感情已勝於閨蜜,Aka仲話:「Super Girls嘅情感,係上天給予嘅緣份。雖然每個人嘅性格都唔同,五人五色,我就比較似傻大姐,所以好多時都俾成員整蠱,都係情趣嚟嘅。」

Jessica笑稱:「記得有一次Heidi生日,我哋喺Whatsapp群組話佢中咗六合彩二獎,係得Aka一個真係打俾Heidi,問佢係咪真嘅,又話自己身邊從來冇人中過六合彩,佢真係太幸運嘞!仲叫Heidi分啲錢俾佢添!」

Yanny借勢問Aka:「平時你有沒有惱羞成怒o架?」Aka即刻真誠咁表示:「真係冇嬲到!呢啲又好難話會嬲得落嘅。」

除咗專注組合發展,亦有往唔同方面同時發展。繼Aka去年十二月舉辦個人畫展, Cheronna最近亦推出咗首支個人跳唱單曲〈把持〉, Heidi就往電影方面努力拼搏,而Jessica則夥拍Yanny,一同參與網劇《向西聞記》演出,各有各挑戰,我祝佢哋繼續發放異彩!

Jessica(右)係隊中最愛品茗嘅成員,Heidi(左)就緊隨其後,惟二人都怕寒涼,少飲綠茶。

 

要有fit嘅體態同保持狀態,運動係冇得偷懶,你睇Aka同Heidi(下圖)就知啦!

 

 

 

芋茸香酥鴨($68/6件),將芋頭蒸好搓成泥狀,再釀入鴨肉,用油酥炸,油溫控制得宜,炸得外酥脆內軟糯。

 

一口反沙芋($58/8粒),將芋頭切粒酥炸,沾滿以白砂糖及清水製糖漿後,放入油鑊,以餘溫將芋頭來回快炒,極考工夫。

 

膳亭
地址:西營盤德輔道西321號瑧璈1樓2號舖
電話:23602993